Khliehriat Nailar 26: Lyngba ka jingïatreilang ki pulit jong ka Umkiang Patrol Post, ki pulit jong ka Ratacherra Infiltarion Check Post lem bad ki shipai Border Security Force, la ïoh ban kem noh ïa ar ngut ki briew kiba dei ki nong Bangladesh kiba la wan rung beaiñ sha ri India kiba wan lyngba ka khlaw kaba don ha shnong khappud ha Pyrtakuna bad kiba thmu ruh ban pyn rung beaiñ sa ïa kiwei pat kiba dang don ha khlaw.
Kitei ki dkhar Bangladeshi ki ba la kem ki dei kiba la tip kyrteng kum u Misba Uddin, 31 snem kyrta bad u Badrul Alom, 30 snem kyrta, kiba na ka shnong shnong Darponagar, District Sylhet, la ïoh bat ïa kine mynta ka sngi ha ka por kumba 12 baje myn sngi.
Katba ki pulit bad ki shipai ki dang peitngor, la ong ba ki ïohi shuh shuh ïa ki nong Bangladesh kiba don ha khlaw kaba don hajan ka jaka ba khlem pat ker pud kaba don ha shnong Pyrtakuna, East Jaiñtia Hills District bad haba ïohi ïa ki pulit bad ki shipai kitei ki briew kiba dang don ha khlaw ki la phet krad noh sha ki jaka ba dei u pud u sam jong ka ri Bangladesh.
La ong ruh ba kitei ki ar ngut kiba la kem noh ki dei ma ki kiba ai jingmut bad thaw lad (mastermind) ban pyn rung tuh bad pyn rung beaiñ ïa kiwei kiwei ki nong Bangladesh kiba la ioh kem myn ha kine ki khyndiat bnai ba la leit.
Ki khubor pulit ki ong shuh shuh ba ïa utei u Misba Uddin, ki pulit ki la thwet la slem namar la suba ba u don kti ha kiwei kiwei ruh ki kam beaiñ, la register case ha Umkiang PP bad ka jingtohkit ka dang ïaid sha khmat.
