Shillong, Nailur, 07: Hynriew ngut ki snar khaii drok ki la shah kem ha ka kynhun Pulit Anti-Narcotic Task Force (ANTF) ka East Khasi Hills District kiba la pynlong ïa ka jingkhynra bad ki Pulit ka Laitumkhrah Police Station ha ka sngi Baar ha ki bynta bapher bapher jong ka thaiñ Laitumkhrah.
Kine ki hynriew ngut kiba la shah kem ha ki Pulit ki kynthup ïa lai ngut ki shynrang bad lai ngut ki kynthei.
Katkum u kyrwoh ba la phah da u Superintendent of Police (City) Bah Vivek Syiem, la pyntip ba ha ka jingpynap shrip, ki Pulit ki la ïohbat ïa kawei ka Local Taxi ML05 K 4437 ha Lower New Colony bad ïoh bat shwa ïa u Debojit Ghosh, uba la 28 snem ka rta, u Badonbok Marweiñ 28 snem ka rta, ïa ka Ibapynhun Marweiñ kaba la 29 snem ka rta bad ïa u Macdonald Khongmalai uba la 26 snem ka rta.
Na ka met jong ki, ki Pulit ki la ïoh kurup 13.54 gram u drok Heroin, 153 ki tyndong, 3 tylli ki mobile phone bad ka kali Maruti Local Taxi.
Ha kane ka jingkhynra, ki Pulit ki la ïohbat ïa kawei ka snar nongkhaii drok kaba la tip kyrteng kum ka Deepika Roy kaba la 32 snem ka rta ha Laitumkhrah Main Road kaba la ïalam lynti ïa ki Pulit sha ka ing jong ka Archana Roy kaba la 25 snem ka rta bad ha kane ka ing ki Pulit ki la ïoh kurup 57.54 gram u drok Heroin, kawei ka mobile phone bad ka pisa T. 1,94,975 lak.
Ha ka jingkhynra ïa ka ingsah jong ka Deepika Roy ha Nongrimbah Laitumkhrah ki Pulit ki la ïoh kurup ïa ka ksiarkaba khia 256.36 gram, u drok Heroin uba khia 66.gram bad ka pisa T. 19,000 hajar.
Baroh u drok ba la ïoh kurup ha kane ka miet u long 137.78 gram, T. 2,14,075 ka pisa.
Ki Pulit ki la register case ha Laitumkhrah Police Station bad pynngat hapoh ka kyndon S 21 (b)/ 25/ 29 jong ka NDPS Act.
