Nongpoh, Ïaiong 22 : Tang na ka daw ka jingdon kti uwei u samla ban thad ïa ka dur jong ka Samla ha ka Social Media WhatsApp, ki Pulit ka Ri Bhoi ki la kem noh 6 ngut ki samla ha ka thaiñ Pilingkata ha Ri Bhoi, kaba dei halor ka jingkynnoh ba ki la don kti ban pynsaphriang ïa ka dur jong kawei ka samla ba la buh rieh noh ïa ka kyrteng.
Kumba la ïoh lum jingtip kane ka jingjia ka la jia ha ka 5 tarik u Ïaiong 2022,ha kaba la kynnoh ba uwei u samla u la thad ïa kawei ka samla kaba u shu video call bad na kane ka jingjia ki pulit ki la ïoh ban kem haduh 6 ngut halor ka jingkynnoh ba ki don kti lang ban pynsaphriang ïa ka dur jong katei ka samla.
Kane ka jingkem ki Pulit ïa kitei ki 6 ngut ki samla ka dei ruh hadien ba kiba haïing hasem katei ka samla ki la ujor da ka ejehar pyrshah ïa utei u samla ba la don kti ban thad ïa katei ka samla haka social Media bad lyngba ka jingbuddien ki Pulit ka Ri Bhoi nalor utei u samla ki la ïoh kem sa 5 ngut ba la kynnoh ba ki don kti ha kaba thad pynkhlemraiñ ïa katei ka samla.
La ïoh jingtip ruh ba napdeng kitei ki 6 ngut kiba la shah kem na ka bynta ka jingtohkit ki don ruh ar ngut kiba dang rit ha ka rta (Under age) bad kitei ki saw ngut kiba la heh ka rta ki la shah set along na ka bynta ka jingtohkit kaba kham bniah halor katei ka jingdon kti ba la kynnoh ban thad khlemraiñ ïa ka dur jong katei ka samla.
