Shillong, Nailar 1 : Ha ka jingïakhun pyrshah ban rat dyngkong ïa u drok hangne ha nongbah Shillong ki pulit na ka kynhun ANTF, East Khasi Hills ki la ïoh ban kem san ngut ki nongkhaïi drok bad ïoh kurup saw tylli ki kali kiba la pyndonkam ha kaba leh ïa kane ka kam beaiñ.
Hadien ba la ïoh jingtip kaba thikna bha ka kynhun ANTF ka la pynap shrip bad ïoh ban bat ïa kawei ka kali Eco Sport ML 05 U 1782 na Jingkieng Demthring ha ka por 6.15 baje janmiet ha ka Sngi U Blei.
Na katei ka kali ki la ïoh kurup 40 tylli ki synduk thep sabon ba la thep ïa u drok ( heroin) uba khia 559 gram. ïa kane ka kali la niah da u Shaniah Kharmawphlang uba dang 19 snem ka rta. Ha ka jingtohkit u la phla ba u don uwei u paralok uba ïaleh lang ïa kane ka kam bad mar mar ki pulit ki la leit kem ïa u Daniel Nongrum 20 snem ka rta uba na Nongrah Nongpdeng bad kurup ruh ïa ka thuk thuk jongu ka Pulsar Ml 05 S 9546.
Shuh shuh haka jingtohkit ki la phla ba kine ki ïoh ïa u drok na ka Esther Ramhmangaih 37 snem ka rta bad ki pulit ki la leit kem ïa ka na ka jaka ba ka sah ha Madanrting, Thembasuk Block F ryngkat bad ka pisa 44,200 tyngka.
Na ka phyllaw jongka ïingba ka sah ki pulit kila ïoh kem sa ïa arngut u Robinson Hmar 19 snem ka rta na Bawngkawn Aizawl bad Letminlen Doungel 30 snem uba na Tuibong, Churachanpur, Manipur. Kine ki dei kiba pynpoi ïa u drok sha katei ka Esther. Ki pulit kila ïoh ban kurup ïa kawei ka Bolero AS 03 M 9080 bad ka Scooty MLO5 W 9432 ryngkat bad ka pisa 2,19,510 lak tyngka.
La ïoh ruh ban kurup ïa hynriew tylli ki mobile phone na kitei ki san ngut ki briew kiba la shah kem. Ki pulit ki la rejister case ha ka kyndon NDPS Act ha Rynjah Police Station bad ka jingtohkit ïa kine ka dang ïaid shakhmat.
