Nongpoh, Nailar 20 : San ngut ki nongïalam ka seng HNYM kila shah kem haki pulit ka Nongpoh hadien bala kynnoh ba ki ju dawa pisa naka por shaka por naki kali Tourist kiba ju kit ïaki briew na shabar ka jylla bad ong ruh ba dei ha ka 16 tarik mynta u bnai ki nongñiah kali tourist kila shah pynsangeh haka thaiñ Nongpoh, Umdihar bad kumjuh ruh haka thaiñ Umsning bad kynnoh ba ka kynhun hapoh ka jingïalam da u Sparly Syngkli ki la dawa pisa 3000 bad 6500 tyngka wat hadien ba kitei bar jylla kiba shong ha katei ka kali tourist ki dei kiba biang ki kot ki sla bad ba la pyllait da ki pulit ka Infiltration ha Byrnihat.
La kynnoh ruh ba kane ka jingdawa pisa kam dei shuh ka sien ba nyngkong, hynrei ki kali tourist ki ju mad ïaka jingeh bad ka jingshah dawa pisa ha lynti ban kiew sha nongbah Shillong bad kane kala wanrah ka jingduhnong kaba khraw ïaki nongñiah kali kamai, bad pynsyier mynsiem ruh ïaki nongñiah kiba ju kamai jakpoh da ka kam ñiah kali.
Halor katei ka jingshah dawa pisa jong ki nongñiah kali kamai, naka liang ka kynhun East Jaintia Hills Tourist Drivers Association bad Iatyllilang Drivers and Tourist Taxi Association kila ujor syndon da ka ejahar ha Nongpoh Police Station namar ka jingshah pyndik ki para nongñiah kali kamai.
Hadien ka jingujor naka liang ki pulit kila pynlong ka jingtohkit mar mar bad ioh kem 5 ngut ki nongïalam bad ki dkhot ka seng HNYM ba kynthup ïa u Sparly Syngkli naka shnong Nongkhrah u ba dei u Chairman ka Anti Influx Cell, Donboklang Kharbani naka shnong Mawroh ba dei u President ka Nongpoh Circle, u Aiborlang Marbaniang na Umjarasi Working President ka Nongpoh Circle, lem bad 2 ngut ki dkhot ba kynthup ïa u Krius Pariong na Pahamrioh bad u Ricky Tangsang na Sajer Nongpoh bad naka liang ki pulit kila dep register mukotduma pyrshah ïa kitei ki 5 ngut bad la ïalam tian bishar ïaki mynta ka sngi ha iing kashari ha Nongpoh, bad ka jingtohkit ïa kitei ki 5 ngut ka dang ïaid shakhmat.
