Shillong, Naitung 24: Ki shipai Border Security Force (BSF) ki la ïoh ban pynpulom ïa ka jingthmu rungtuh bad kumjuh ruh ki la ïoh bat ïa 5 ngut ki nong Bangladeshi, ba kynthup ïa 2 ngut ki shynrang, arngut ki kynthei, bad kawei ka khynnah kynthei ba dangrit hajan khappud kaba ha East Jaiñtia Hills.
Kane ka jingkhynra ka la long hadien ka jingïoh jingtip kaba thikna haba ïadei bad ka rung ka mih hajan ka jaka khlaw ha shi lynter ka khappud ka ri.
Ïa kane ki shipai BSF ki la lap bad ïohi ïa kane ka jingwan rung beaiñ ha ka por ba ki dang pynlong ïa ka jingïaid pahara bad mar mar ki la ker kut ïa kane jaka ha kaba kane ka la lam sha ka jingïoh bat ïa kitei ki nong Bangladeshi kiba la rieh ha ka sañium na ka daw ka jingtap lup jong ka jingdum bad ka jingrben ka ñuit ka ñier.
Ïa kitei ki nong Bangladeshi, ki shipai BSF ki la aiti noh sha ki pulit na ka bynta ban pynïaid ïa ki kam katkum ki aiñ bad ban pynlong ki jingtohkit.
Ki shipai BSF Meghalaya ki la ïaiban ki jingaiti ban ïada ïa ka jinglong laitluid bad ka jingskhem ki khappud jong ka ri, da kaba pynlong ïa ka jylla kaba peitngor bha bad ban ym ailad pyrshah ïa kane ka jingwan rung beaiñ kiba nabar ri shapoh u pud u sam ka ri.
