Shah kem 4 ngut ki trai Karkhana Coke be-aiñ ha Shallang, pynngat Benami Act ïa kiba shah kyrteng

Nongstoiñ, Jylliew 27: Ki Pulit ka West Khasi Hills District, ki la kem sa ïa ki saw ngut ki trai jong ki karkhana coke ba treikam be-aiñ hapoh ka District, ha kaba ki la pynap ruh da ka aiñ Benami Act pyrshah ïa ki trai shnong kiba pynshah kyrteng na ka bynta ki Bar Jylla ba kin seng karkhana be-aiñ.
Kine ki saw ngut ki kyrteng ki long u Hopeful Nongtdu ba na Rymbai Synrang Shahkhaiñ, East Jaiñtia Hills, u Khrawbok Rongrin ba na Sohbar A Shallang, u Ashish Arya ba na Ba Guw Kamrup bad u Yaman Bansal ba na Beltola Tiniali Guwahati kamrup.
Ïa kine ki trai karkhana coke ba beaiñ la kem hynnin ka 26 tarik Jylliew da ki Pulit Special Investigation Team (SIT) ha ryngkat ka jingïadonlang ki Magistrate bad ki DMR. Ïa kine ki 4 ngut la pynngat happh ka Shallang PS Case No. 39(12)2022 U/S 188/34/379/120 B IPC R/w Sec 3(1)/21(1) MMDR Act, R/w Sec 15 Environment (Protection) Act bad Sec 3 Explosive Substances Act.
Dang ha ka taiew ba la lah, ki Pulit SIT ki la kem ïa uwei u heh spah na Beltola u ba pynïaid ïa ka karkhana coke ba beaiñ ha Shallang. Une u hehspah u kyrteng u Youdishtra Bhama, trai jong ka M/S Kalyani Fuels Limited.
Na kine ki 4 ngut ba dang shu shah kem, u Hopeful Nongtdu u dei jong ka M/s HV Coke Limited bad ki lai ngut kiwei pat ki dei jong ka M/S Yash Coke Limited.
Kane ka jingkhynra ïa ki karkhana coke ba beaiñ hapoh West Khasi Hills ka la jia tang shisngi hadien ba ka Ïingkashari Meghalaya High Court kaba bthah ïa u Director General of Police (DGP) ban wad ban kem ïa baroh ki trai jong ki karkhana coke ba beaiñ hapoh ka Jylla.
Haba ïakren bad ki Heh Pulit ka District, la ïathuh ba ki don haduh 61 tylli ki karkhana coke ha ki thaiñ Shallang, West Khasi Hills bad napdeng kine, tang 4 tylli ki dei kiba don ïa ki kot ki sla kiba biang ban treikam katba kiwei kiwei ki dei ki ba shu treikam be-aiñ.
Ki pyntip ba bun na kine ki karkhana be-aiñ la khang khyrdep lut mynta bad ka jingthwet ïa ki trai ka la ïaid shakhmat.
Kumba long mynta ka Ïingkashari ha Nongstoiñ ka la shlei mynta da ki nongïasaid Aiñ kiba wan na kylleng ki jaka ban pynïakhun mokotduma, ban bah jamin lypa ïa kiba bun ki trai jong ki karkhana coke kiba phet rieh mynta.
Haba kylli, ki Heh Pulit ki pyntip ba ha ka jingtohkit ïa kine ki karkhana ba be-aiñ la shem ba bun na ki Khasi kiba pynshah kyrteng na ka bynta ki bar jylla ba seng karkhana coke be-aiñ ki dei na ka kur Nongrum bad Sohbar.
“Ngi la pynap mynta da ka Benami Act ïa kine ki trai shnong kiba pynshah kyrteng bad ngin sa leit kem noh ïa ki ha kine ki sngi ban dang wan ban tian bishar ïa ki kat kum ki kyndon aiñ” ong ki heh Pulit.
Lah ban kdew hangne ba ka aiñ Benami ka dei ka aiñ ban teh lakam ïa ka jingleh business ha ka kyrteng kiwei ban buhrieh ïa ka jingdon jingem bad ban lait ka siew khajna sha ka Sorkar.
Ïa kine ki saw ngut kiba shah lem la ïalam tian bishar hynne ka 27 tarik Jylliew bad ka Ïingkashari ka la phah set ïa ki hapoh ka Judicial Custody kaba 14 sngi.