Tura, Naitung 4 : Saw ngut ki briew ki la shah kem ha ki pulit jongka Phulbari Police Station namar ba ki donkti ban rahbor ïa kawei ka longkmie bad i khyllung na Rongkhon Bazaar sha Dhubri, Assam.
Ha kaba nyngkong ki pulit ki la ïoh kem shwa ïa u Moni Zaman, u khun jong u Kaybor Ali na Shyamding bad hadien ka jingtohkit bniah sa ïoh ban kem ïa kitei ki lai ngut kiwei pat.
Ki pulit ki ïathuh ha ka jingtohkit bniah ïa u Mozi Zaman u la phla ba la rahbor ïa kane ka longkmie bad i hyllung bad buhrieh ïa ki ha kawei ka jaka ha Baituli kaba hap ha ka Dhubri District jongka Assam. Mar mar ki pulit ki la hiar sha katei ka jaka bad da ka jingïatrei lang bad ki pulit Assam la ïoh ban pyllait im ïa baroh arngut.
Hadien kane la tohkit bniah shuh shuh da ki pulit bad ki la ïoh jingtip ba ki don sa lai ngut kiwei kiba ïadon kti lang bad kine ki don ha Phulbari. Ki pulit ki la thwet jur ïaki bad ïoh ban kem ïa baroh lai ngut, kine ki dei u Nur Alom uba dei na Rajabala, u Mosaidul Sheik na Baigaon bad Nazidur Rehman uba dei na New Baithbari.
