Shillong, Nailar 04: Kumba arngut ki nongkhaïi drok kila shah kem ha ryngkat bad 52.02 gram u heroin ha ka jing talasi kali ba la leh lang hapdeng ka kynhun Anti Narcotics Task Force (ANTF) bad ki Pulit ka West Jaiñtia Hills District ha ka step sngi Nyngkong.
Kine ki arngut ki dei kiba la ithuh kum u Milton Chakraborty ba ju khot sin u Lucky bad u Kasimuddin.
Ïa kane ka jingtalasi la leh halor ki khubor ba thikna, kaba la ïoh pdiang da ka ANTF ba ha ka miet 3 tarik Nailar, arngut ki briew ba suba kit drok kin wan da ka bos Night Super ka MTC na Silchar sha Shillong, ong u SP ka West Jaiñtia Hills Jagpal Singh Dhanao.
Na ka liang jong u, u la ïathuh ba ki heh ka ANTF kila ïatreilang mar mar bad ki Pulit ka Jowai bad kila pynïeng ïa ka jaka talasi kali ha Mihmyntdu Soomer.
Shuh shuh u ïathuh ba ha ka por 4 baje mynstep jong ka 4 tarik Nailar, ka ANTF kala ïoh bat ïa kane ka bos ba don u nombar ML03-0189 bad la pynlong ïa ka jingtalasi kat kum ka kyndon 50 jong ka NDPS Act.
U la ong ba ka kynhun ka la ïoh ban kurup ïa artylli ki synduk sabon ba thep drok na ka met u Kasimuddin, kaba la buhrieh kawei ha pla platlun bad kawei ha ka patlun poh.
La ong ba nalor kane, la ïoh ruh ban kurup ïa lai tylli ki synduk sabon ba thep drok na ka patlun poh jong u Milton Chakraborty.
Ha kaba ïadei bad kane ka ANTF ka la kurup noh ïa kine ki drok bad ïa ki briew la register case ha Jowai Police Station hapoh ka kyndon 21(b)/29 jong ka NDPS Act. Ka jingtohkit mynta kala ïaid shakhmat ha kaba ïadei bad kane ka kam.
