Shillong, Nohprah 18 : Arngut ki dkhot (Over Ground Worker) jongka seng Hynniewtrep National Liberation Council (HNLC) ki la shah kem mynta ka sngi hadien ba ki pulit ki la lap ksai ba ki ïadonkti ban pynbthei bom IED ha jaka buh tiar ka Dhar Company ha Shymplong , East Jaintia Hills.
Ha kane ka jingbthei bom la ïathuh ba kaba julor ka dei tang ka kali kit um jongka kompani bad ym don mano mano ruh ba iap kumba la kam da ka HNLC.
Na ka liang u SP ka East Jaintia Hills u la pynthikna ba la kem ïa ki arngut kiba donkti bad ki la phla ruh ba ki leh ïa katei ka kam pynbthei bom.
“ Arngut ki dkhot ka seng HNLC kiba dei ki Over Ground Worker ki la shah kem bad ki la phla ruh ba ki leh ïa katei ka kam pynbthei bom” ïathuh u SP.
Na ka liang u SP u la ïathuh ba ka jingtohkit ïa kitei ki arngut ka dang ïaid shakhmat namar ki dang don shuh shuh kiba ïadonkti bad u la ong ba shen yn sa ïoh ban kem ïa ki.
“ Ka jingtohkit ka dang ïaid shakhmat bad la buh bun kynhun ban bud dien ïakane ka jingjia.
Ka HNLC ka la kam ba ka jingpynbthei bom ïa ki jaka buh tiar ka Dhar Company ka dei namar ba u Symbud Myntri Rangbah ka jylla u ma Sniawbhalang Dhar u khlem siew ïa ka pisa ba ka seng ka dawa.
Halor ka jingkam ka seng ba uwei u briew u la iap, na ka liang u SP u la ïathuh ba ym shym la don mano mano ruh ba khlad ha katei ka jingbthei bom. U SP u la ong “ Ka jingkam jongka HNLC ba don ba iap ka long kaba bakla. Hooid ka jia ka jingbthei bom tangba ka jingkam ba don ba iap kam long kaba shisha”.
