Nongpoh, Rymphang 27: Uwei u briew uba la tip kyrteng kum u Benjamin Sohtun, 35 snem ka rta, na ka shnong Pahamlapong, Nongpoh, u la shah kem noh ha ki pulit hadien ba u la donkti ha ka jingpynrung bad jingïalam lynti ïa ki khun samla lyngba ki social media ban pynïasoh bad ka kynhun HNLC.
Hadien ka jingtip kaba thikna, ka kynhun pulit jong ka Ri-Bhoi lem bad ka Anti-Terrorism Squad ki la hiar ban khynra ïa ka ïing jong utei u briew bad la kem noh ïa u ha ka 23 tarik Rymphang 2026 na Ri-Bhoi District bad la ïoh kurup ruh bun tylli ki sakhi sabut.
Shuh shuh, katkum ka jingphla jong utei uba la shah kem, ki pulit ki la kem sa ïa uwei pat uba la tip kyrteng kum u Jenesis Sohkhwai, 23 snem ka rta, na ka shnong Umsohbar, Ri-Bhoi District, ha Patharkmah ha ka 26 tarik Rymphang 2026 bad la kynnoh ba u la donkti lang ha ka jingïapynbeit bad sylla bad u Benjamin Sohtun ban pynkhreh ïa ki bom IED (Improvised Explosive Device).
Ha kaba ïadei bad kane ka kam, la register case ha Nongpoh Police Station kum ka Case No. 15(2)2026 hapoh ki kyndon 113(3)/147/148 jong ka BNS, bad ka jingtohkit ka dang ïaid shakhmat ban lap ïa kiwei pat kiba lah ban don jingïadei bad u Benjamin Sohtun.
