K a ju don ka kyntien kaba ong ba u lehrain, da u nongpeit ïa u nongeit bad kane ka la urlong hi thik, ha kane ka kynti kaba mynta, ha kaba kito ki khyndiat ngut ki MDC barim, kiba donbok ba ki dang wan phai biang, ki la ther tyngeh ïa ka Executive Committee ba thymmai, halor ka jingdon jong kine ki khyrdop.
Hynrei ngi dei ban kynmaw ba kine ki khyndiat ngut ki la long ki EM bad ki CEM jong ki Executive Committee barim, ba la khlieh da ka NPP lane jong ka UDP, hynrei khala khala ki la klet ïa ka lyngthoh doh lajong, da kaba ki kdew kti sha ka EC kaba thymmai, halor ka jingdon jong kine ki khyrdop lum pisa beaiñ, kiba don kylleng ka ri Khasi bad Ribhoi ruh kumjuh.
Kane ka jingkynnoh, ka leit mih ha ka jingïatainia ha katei ka dorbar, ha kaba la ïathuh ba ki don 16 tylli ki khyrdop jong ka KHADC bad kitei ki ai kamai tang T.26 lak lane haba kheiñ antad, kan long tang kumba shilak shiteng na kawei ka khyrdop bad lada ka long kumta, ka pyni, ba ka jingkynnoh jong ki draibar trok, ka la urlong shisha, ba kaba bun ka khajna, ka leit sha ki katto katne.
Wei haba ka la mih ka jingïatai, hapoh ka dorbar jong ka KHADC, U CEM, uba thymmai, u dei ban sei madan lut ïa kane ka jyrsieh baroh kawei bad kaba nyngkong, ka long ban sei ïa ki kyrteng jong ki nonglum khajna bad ki jaka shong jaka sah jong ki bad ka jingdon jong ki sha kano kano ka seng saiñ pyrthei kum ka UDP, NPP, Congress, VPP, BJP lane katba dei bad nangta sa ka rukom pynïaid ïa katei ka jingaiwai, na ka bynta ban lap ïa ka jingshisha, halor katei ka jingmih kaba T.1lak na kawei ka khyrdop bad lada lap, ba ka don ka jingleh beaiñ, kumta ka dei ka kam ban tohkit pyrshah ïa kitei kiba donkti bad ban sei madan ïa ki kyrteng jong ki MDC lane ki EM, CEM kiba donkti ha ka kam.
Ka EC kaba mynta, ka dei ban ïaid stet haba wad ïa ki jingshisha, lada dei ha ka jingthung kam beaiñ, ha ki EC ba la dep, ka jingbym ai kaiphod halor ki skhim kiba la sam sha ki paidbah, kumba la kynnoh U CAG, ka jingpynlut pisa kaba haduh T.20 lak ban thied ïa ki tiar computer ha katei ka ophis bad nangta ba ïa kitei ki computer, la rah da ki nongtrei sha la ïing bad kam dei tang katta, ka EC ka dei ban tih tyllong ruh halor ka jingdonkti jong ki MDC lane ki EM barim, ban kurup jubor ïa ka jinglum khajna jong U Syiem Mylliem na Ïewduh, da kaba ki pynïaid hi dalade bad nangta sa ka jingplie ïa ki Ïew masi, ha kiba bun ki jaka khlem ka rukom pynïaid kaba biang bad kine ki dei ki mat kiba kane ka EC, kaba thymmai ka dei ban long kaba ïaid beit, kaba shai bad kaba shlur ban khynra naphang ïa ka jyrsih kaba la jia ha kine ki phew snem ba la dep.
Nangta dang donkam shuh shuh ïa ka EC kaba mynta ba kan dang wad ïa ki lad ki lynti kumno ban kyndang ïa ka jingbam sap bapher bapher ha ki por ba la leit, kumba ka la kam ba kadei ka EC VPP kaba kwah ban don ïa ka khuid ka suba kumta donkam ban pyni da ki kam ym tang ban shu heh ka nia.
Ha kaba ïadei bad kane la donkam ruh ïa ka Executive kaba thymmai ba kan shim khia ha kaba ïadei bad kane ka jingïohlum khajna naduh ki EC barim khnang ba kan long kaba shai ïa ki paidbah ha kaba ïadei bad kane ka kam.
