Shillong, Jylliew 27: Ka Food and Drug Administration (F&DA) dangshen ka la shah ïa ki briew kiba la samla ne heh ka rta ban pyndonkam ïa u electronic sikret uba don ïa ka jingsma, da kaba ki la ïohi ba ka jingdih ïa kine ki kynja sikret ba don jingsma ki lah ban pynduna ïa ka jingma kaba mih na ka jingdih ïa ki duma kiba la ju dih baroh shi katta.
Ka FDA ka ïathuh ba ka la shah ïa ki saw tylli ki e-cigarette kiba sma menthol ba la pynmih da ka Njoy, kaba long ka kyrteng jong kine ki kynja sikret ba la shimti da ka kompeni Altria kaba long ka kompeni pynmih duma kaba heh bha, kaba die ruh ïa u sikret Marlboro.
Ka jingainam ban pynïoh ïa kane ka rai kaba thymmai ka ïaid sha ki kompeni ba shna ïa kine ki kynja sikret ne ki vaping company’ kiba la kam la slem bha ba ki mar ba ki pynmih kin ïarap ban pynduna ïa ka jingdih duma, ïa kaba la kynnoh ba ka jingïap jong kumba 480,000 ngut ki nong U.S.
Man la u snem kadei na ka daw jong ka jingpang bampong, ka jingpang jong ki tor bad ka jingpang klongsnam. La die ïa kine ki E-cigarette ha U.S. naduh ka snem 2007 hynrei ha kine ki snem ka jingïoh nong na ka bynta ki nongdih ka la shah kah syrngiew noh da ka jingpyndonkam jong ki khynnah kiba dang sdang khie samla bad kiba dang rit ha ka rta.
Ki kynhun jong ki kmie ki kpa bad kumjuh ki kynhun jong ki briew kiba pyrshah ïa ka jingdih duma ki la kren pyrshah mardor ïa kane ka rai, kaba la wan hadien bun snem ban pynbor ïa ki nongpynïaid aiñ ban buh da ki jingdih kiba don bad ka jingmad menthol bad kiwei kiwei ki jingmad kiba lah ban khring ïa ki khynnah kiba ka rta jong ki ka dang long kiba rit.
“Kane ka rai ka lah ban wan sha kata ka jingong kaba ngin ym lah ban tehlakam ïa ka jingkynrei ka jingdih jong ki khynnah samla ïa kine ki jait jingdih duma,” ong ka Meredith Berkman, co-founder jong ka kynhun Parents Against Vaping E-cigarettes.
“Ka FDA sa shisien ka la ktah ïa ki longïing ka America da kaba ka la shah ïa kum kane ka karkhana ba kan ïoh ïa ki nongthied ba shi jingim bad kiba long ki pateng ba bud- kata ki khun jong ka America.”
Ka jingtan jong ki samla ïa kine ki jait jingdih duma ba la tip kum ka vaping ka la hiar na kaba ju kiew bha ha ki snem ba la dep, ha kaba kumba 10% na ki khynnah high school la ong ba ki pyndonkam ïa ki e-cigarette mynshem snem. Napdeng kito kiba tan ïa kine ki jait sikret, 90% ki pyndonkam da kito kiba don jingmad, ba kynthup ïa u menthol.
Baroh ki e-cigarette kham ha shwa ba la shah ban pynmih da ka FDA ki dei ki duma, ha kaba ym da bun ki khynnah samla kiba dih ïa kine kiwei ki kynja sikret ne vape kin pyndonkam.
Ka Njoy kadei kawei na ki lai tylli ki kompeni kaba la ïoh ïa ka jingmynjur kham mynshwa na ka FDA ban pynmih ïa kine kiwei ki jait sikret bad la tip kum ki vape.
La ong ba ar tylli na kum kine ki sikret ba la pynmih da ka Njoy kiba don ïa ka jingmad menthol la shna kum i kynja synduk ne cartridge ïa kaba lah ban plug ha kino kino ki tiar kiba lah ban pyndonkam biang ban pynkhluid ïa ka nicotine kaba don hapoh, bad pynlong ïa une u jingdih kum u kynja ba lah ban ring mynsiem.
Ki ar tylli kiwei pat kiba kum kine ki jait sikret ne e-cigarette ba la pynmih da ka Njoy kiba long menthol kidei kiba lah ban pyndonkam tang shisien.
Ka jingdie ïa kine ki jait sikret ba pynmih da ka Njoy ki duna 3% ka jinglah die haba ïa nujor bad kiwei ki e-cigarette ba la die ha U.S ha ki snem ba la dep, kane ka long katkum ka jinglum jingkheiñ jong ka Nielsen ïa ka jingdie.
U Vuse, ba la pynmih da ka Reynolds American, bad U Juul ki poi kumba 60% ha ka jingdie ïa ki ha ïew, bad kaba sah na kata ka ïaid sha kiwei pat ki sikret kiba kum kine ki jait kiba pyndonkam tang shisien pyndonkam.
Bun na ki khynnah kiba dang ha ki snem kiba dang rit ne ha ki khat snem ka rta ki dih sikret ha kane ka rukom ki pyndonkam da ki e-cigarette kiba lah ban pyndonkam tang shisien, ba kynthup ïa ka u sikret ba la pynmih da ka Elf Bar, uba don jingmad watermelon bad blueberry ice.
Katkum ki jingkheiñ jong ka Altria la pyni ba ki e-cigarette ba la pynmih da ka Njoy ki ïarap ïa kiba pyndonkam ba kin duna ka jingtan ïa ki chemical kiba sniew kiba mih na ki sikret kiba ki ju dih naduh mynshwa, la ong ka FDA. Kane ka shnat ka la ban jur ba kine ki jait sikret kim dei kiba shngaiñ ne kiba la ïoh ïa ka jingmynjur na ka FDA, bad kino kino ki bym pat ju dih kim dei ban pyndonkam ïa ki.
Kane ka jingleh ka long kum shi bynta jong ka jingpynthymmai ka FDA ïa ka rukom treikam ban khmih bniah bha katkum ka jingstad saïan ïa ka ïew die ïa kine ki vape hadien ba la pynslem ban khmih bniah da ki snem mynta.
Ka ïew ha U.S. ïa mynta ka kynthup ïa bun jait ki vape kiba don jingmad soh bad jingmad mit mit kiba long beaiñ hynrei kiba lah ban ïoh na ki dukan, na ki jaka thep umphniang ne gas station, bad na ki dukan die ïa ki vape.
Ka FDA ka hap ban leit mih bad shah bishar da ka ïingkashari ha kaba kut jong une u bnai bad ka jingkhmih bniah ïa kine ki vape ba kynthup ïa u Juul bad Vuse. Kine ki brand la die ha U.S. da ki snem mynta, bad kiba dang ap ïa ka rai jong ka FDA ha kaba ïadei bad ki kyndon scientific ba la pyndonkam ha ki.
Khnang ba kine ki jait sikret kin neh ha ka ïew, ki kompeni kidei ban pyni ba ki e-cigarette kin ai jingmyntoi ïa ka koit ka khiah jong ki nongpyndonkam, bad ha kajuh ka por ba kim dei ban long pat kiba khring ïa ki khynnah rit.
“Katkum ki jingwad bniah ba la leh da ka jingstad saïan, ki dak ki shin ki long kiba khlaiñ ha kaba ïadei bad ka jingïoh nong jong ki nongpyndonkam namar ba ki la pyndonkam da ki jingdih kiba kham duna ka jingma bad kane ka la long kaba biang ban pyni na ka duna ka jingma ïa ki samla,” ong U Matthew Farrelly jong ka FDA’s Center for Tobacco Products.
Ka jingmih na u Juul ba la pynmih da ka Altria jong ka Richmond ka la kot sha ka $13 billion ha ka snem 2018, mynba kane ka brand ka la bat ïa ka ïew vape ha U.S. Hynrei ka dor jong u Juul ka la hiar hadien ka mukotduma bad ka jingtohkit kaba ïadei bad ka jingïadon bynta jong ka kompeni ha kaba ïadei bad ka jingkiew sted jong ki khynnah ki bym pat dei ka rta ban dih ïa u vape ha baroh kawei ka ri.
