Nongstoiñ, Jylliew, 15: Ka Hima Riangsih Sirdarship naduh ba la khlad noh u Bah Kardiant Sohmad ba dei u Sirdar ka Riangsih Sirdarship ha ka 27 Nailur 2021, naduh katei ka por la pynïaid da u Bah Aldinal Sohmad ïa ka Hima Riangsih kum u Deputy Cum Acting Sirdar hapoh ka Hima Riangsih.
Hynrei, hadien ba ym don ha ka met ka bym khlaiñ bha u la iehnoh ïa ka kam Acting, kumta ïa ka hima la nang pynïaid da u Secretary cum Acting Bah Wolningstar Sohmad. Hynrei ka khubor kaba kmen ka long ba ha ka 14 tarik Jylliew 2025, la jied ïa u Sirdar ba pura jong ka Hima Riangsih.
Ka jingjied ïa u Sirdar ba pura ka Riangsih Sirdarship da ka jingwan u Returning Officer ka KHADC ha ryngkat ki katto katne ngut ki officer ka KHADC, la jied bad ïa I bah Ollnington Sohmad.
Ïa ka jingïalang da u Returning Officer jong ka KHADC Bah W.Lyngdoh bad la jied Sirdar ba pura ka Riangsih Sirdarship ïa u Bah Ollnington Sohmad.
Da ka jingjied bad ka jingmynjur lang ki nongjied ba dei na ka kur Sohmad, ki la pynpaw da ka jingrah kti kum ka dak ka jingmynjur lang bad ha ryngkat da kaba soi la ki jong ki jingsoi ïa la ka kyrteng kum ka jingmonlang ban pynlong ïa u Bah Ollnington Sohmad kum u Sirdar u ba pura hapoh ka Hima Riangsih Sirdarship.
Ha kajuh ka por na ka liang u returning officers hadien ba la ïoh ïa ka jingmynjur lang na ki nongjied, la ïoh ban pynskhem ïa u Bah Ollnington Sohmad ba u dei u Sirdar ba thymmai bad u Sirdar u ba pura hapoh ka Hima Riangsih Sirdarship.
U Bah Ollnington haba ai jingkren lyngkot, u la ai khublei ïa ki officers, ki electors, ki kur Sohmad, ki Sordar shnong bad ïa ki khun hima. U la kyrpad ïa ki Sordar shnong, ki kur, ki khun hima baroh kawei ban ïatreilang, khnang ba ka kam jong ka Hima kan ïaid beit ïaid ryntih.
