Shillong, Jymmang 29: U Bah Finely Pariat General Secretary ka Meghalaya State Olympic Association (MSOA) u la shah jied kum uwei na ki vice president jong ka Athletics Federation of India (AFI). U Bah Finely Pariat u la shah jied ha ryngkat ki laingut kiwei pat kum ki vice president ha ka jingïalang jong ka Annual General Meeting jong ka Athletics Federation of India kaba la long ha Chandigarh naduh ka 27 tarik haduh ka 29 tarik Jymmang.
U Dr Anwar Ameen uba dei u President ka Kerala Athletics Association, J.S Patnaik President jong ka Orrisa Athletics Association bad Sunny Joseph Secretary ka Delhi Athletics Association kum ki dkhot ka executive committee.
Ïa u Bah Finely Pariat ha ryngkat ki lai ngut la pynkup burom da ka Anju Bobby George kaba dei ka Senior Vice president ka AFI bad ba khur takma rupa ha ka World championship Dr Lalit Bhanot, Addile Sumarila President AFI bad MK Pathak treasurer AFI. “Ka long ka burom bad ka kabu na bynta jong nga ban don shah jied kum uwei na ki nongkitkam ka AFI bad na ka jylla kaba rit ban shah ithuh ha ka ri hi baroh kawei bad ba nyngkong tam na ka jylla ha ka Athletics,” ong u Bah Finely Pariat ha ka kyrwoh khubor.
“Nga ai ka burom sha U Blei na bynta kane ka lad kaba nga khlem khmih lynti, nga ai khublei ïa ka Athletics Federation of India kaba la ai bynta bad shanñiah ha nga bad kumjuh ruh ïa ki paralok kiba la ai mynsiem kyrkhu kyrdoh na bynta jong nga.”
