Shillong, Nailar 16: Ar ngut ki khynnah ïalehkai phutbol ba dang khie san jong ka jylla Meghalaya, u Manbhakupar Malngiang bad u Banlamkupar Rynjah ki la shah jied ha ka kynhun ïalehkai Under-17 jong ka ri India, katkum ka thup kyrteng ba la pynbna. Ka jingpaw kyrteng jong kine arngut ka la wan hadien ba u Samla Lionel Daryl Rymmei u la shah jied ha ka kynhun U-20 ka India na bynta ka SAFF U20 Championship 2024.
Kine baroh arngut ki la shah kynthup ha ka kynhun ki 31 ngut ki player kiba pynkhreh ha ka prokram kilanmet kaba la pynlong ha Srinagar, na bynta ka SAFF U-17 Men’s Championship 2024 ka ban long ha Bhutan ha u Nailur ba ka kynhun kan ïashimbynta.
Hadien kane, ka ri kan ïashimbynta ruh ha ka AFC U-17 Asian Cup Qualifiers ha Thailand ka ban sdang ha u Risaw. Kum shi bynta ka jingpynkhreh, ka kynhun kan leit sha Bali ban ïakhun ar tylli ki jingïalehkai paralok pyrshah ïa ka Indonesia ha ka 25 bad 27 tarik u Nailar.
Haba phai sha u Manbhakupar, u dei u khynnah lehkai jong ka Lah Bet FC, kaba kynhun kaba ïatehlok bad ka Bhaichung Bhutia Football Schools. U la dei lypa u rangïalehkai ba la ïoh mih madan teng ïa ka ri kaba la jop ïa ka SAFF U-16 Championship final pyrshah ïa ka Bangladesh ha u Nailur jong u snem ba ladep.
Katba u Banlamkupar Rynjah, u dei u player ba shakhmat jong ka Shillong Lajong FC, hynrei katkum ka thup kyrteng ba la pynbna, ka All India Football Federation ka la pynrung ïa ha ka thup ki rangïalehkai pdeng (midfield).
Kane ka lympung jong hynñiew tylli ki ri yn pynlong ha Bhutan naduh ka 18 tarik haduh 28 tarik Nailur, ha kaba ka India ka la shah pynïakap ryngkat ka Maldives bad ka Bangladesh ha ka Group A, katba ka Bhutan, Nepal, Pakistan bad ka Sri Lanka kin ïakhun na ka Group B.
Hadien ka jingïaid lynti ha ka SAFF ka la kut, ka kynhun kan bteng ban kilanmet ha Srinagar ban pynkhreh ïa ka 2025 AFC U-17 Asian Cup Qualifiers ban long ha Thailand ha u Risaw.
Ka kyrteng jong ki player kiba la shah jied:
Goalkeepers: Rohit, Aarush Hari, Suraj Singh Aheibam
Defenders: Lekhachandra Phairembam, Mohammed Kaif, Yaipharemba Chingakham, Usham Thoungamba, Chingtham Renin Singh, Abdul Salha, Karish Soram, Jodric Abranches.
Midfielders: Banlamkupar Rynjah, Mohammad Sami, Vishal Yadav, Manbhakupar Malngiang, Mohammad Arbash, Brahmacharimayum Sumit Sharma, Ngamgouhou Mate, Ningthoukhongjam Rishi Singh, Levis Zangminlun.
Forwards: Prem Hansdak, Ahongshangbam Samson, Lairenjam Bharat, Hemneichung Lunkim
