“Ka la don ha ka jingpeit pyrman jong ka BCCI la kham slem bha hynrei ka duh bunsien ïa ka kabu ksiar. Kumta nga da sngewkmen eh ba ka lashah jied bad kyrmen ba kan ïoh ban ïalehkai bad lah ruh ban ïalehkai bha na bynta ka Team India kumjuh ruh ha ka Women’s Premier League,”
President MCA – Naba Bhatacharjee
Shillong, Naiwieng 12 : Ka thei ïalehkai kriket ka jylla, ka Debasmita Dutta kaba dei ruh ka kapten jong ka kynhun ïalehkai ki thei kriket ka jylla, ka la shah jied ban mihkhmat ïa ka kynhun India-C ha ka lympung ïalehkai jong ka Senior Women’s T20 Challenger Trophy kaban sa long shen.
Kumta halor kane, na ka liang ka Meghalaya Cricket Association ki pynpaw ïa ka jingkmen kaba khraw bad pyntip ruh ba kane ka lympung kan long ha Ranchi, Jharkhand naduh ka 17tarik mynta u bnai.
Ka Debasmita kaba dei ka nongshong shnong na Shillong ka la sdang ban ïalehkai kriket naduh ka rta kaba dang rit bha. Ha ka por ba ka Meghalaya kam pat ïoh ïa ka jingithuh kum ka dkhot ba pura jong ka Board of Control for Cricket in India (BCCI), kane ka thei ïalehkai ka la leit sha Bengaluru na bynta ka jingpule bad dei kane kaba la pynlong ïa ka ban shah jied pat ha ka kynhun ïalehkai jong ka Karnataka Junior team.
Nalor ba ka tbit ruh ban tied, ka dei ruh ka thei ïalehkai kaba bit wat ban kawang bol khamtam ban kawang spin.
Kumta, ka Debasmita ka la wanphai noh sha ka jylla hadien ba ka BCCI ka la ai jingbit bad ka jingithuh ïa ka Meghalaya kum ka synjuk ba la ïoh jingithuh bad mynta ka kylla long kawei naki thei ïalehkai kiba kynsai tam jong ka jylla nalor ba ka long ruh ka nuksa bad ka jingai mynsiem ïa kiwei ki samla kynthei bad jied ïa kane ka jingïalehkai.
Dang shen, ka la shah jied ruh ban pdiang ïa ka khusnam Player of the Tournament ha ka lympung NECDC 1st Senior Women’s Interstate Friendship T20 Tournament kaba long ha Nongkhrah, Ri-Bhoi, bad ka la shah pynkupburom ruh ha ka North East Cricket Development Council (NECDC) kaba long ha u Jylliew.
Nalorkine, ka Debasmita ka la pyndep ruh ïa ka Level A coaching course na National Cricket Academy, Bengaluru.
Wat haba ka la dep ban leit shah pyntbit ha kiba bun ki lympung ïalehkai jong ka Ri, kam pat ju ïoh pat ïa ka lad ban mihkhmat ïa ka Ri ha ki lympung kiba kham heh.
Dang ha ka samoi ba la dep, ka Ajima Sangma jong ka Meghalaya kala shah jied ban donlang ha ka thup jong ka India-A hynrei ka khlem ïoh satia ban ïalehkai.
Kumta, katei ka jingshah jied jong ka, ka la pynlong ïa kiba bun ban phah ïa ki khubor ai jingkitbok kynthup na ki jylla jong ka NECDC, nangta na ki nongïalehkai kiba rim, ki coach bad ki nongïalehkai kriket.
Na ka liang u President ka MCA, u Nababrata Bhattacharjee u la ong, “Ka la don ha ka jingpeit pyrman jong ka BCCI la kham slem bha hynrei ka duh bunsien ïa ka kabu ksiar. Kumta nga da sngewkmen eh ba ka lashah jied bad kyrmen ba kan ïoh ban ïalehkai bad lah ruh ban ïalehkai bha na bynta ka Team India kumjuh ruh ha ka Women’s Premier League,” u la ong.
Ha kajuh ka por, u Secretaryjong ka MCA u Bah Gideon Kharkongor u la ong ba u la ïohi ïa ka rukom ïalehkai jong ka Debasmita naduh ba ka dang rit ha ka lympung jong ka Shillong Cricket Academy. Kumta u ong ba ka dei hok ba kan shah jied ban don lang ha ka thup jong ka kynhun ïalehkai ka Ri.