Shillong, Kyllalynkot 02: Ka Riiohlang Dhar ka la shah jied biang ha ka thup ki nongpynïaid jingïalehkai lane ki match official jong ka FIFA na ka bynta u snem 2026 (FIFA International List of Match Officials 2026).
ïa kane la pyntip da ka tnad Referee jong ka All India Football Federation (AIFF) sha ka Meghalaya Football Association ha ka 31 tarik Nohprah.
Ka Riiohlang Dhar, kaba la ithuh kum ka Assistant Referee ha ka kyrdan jong ka FIFA, ka la ïoh bynta ban pynïaid ha kiba bun ki jingïalehkai bar ri (International) ha kine ki snem ba ladep. Ka la long tang ka nongpynïaid jingïalehkai (match official) kaba ar jong ka ri India ha ka World Cup U-17 ki kynthei ha u snem 2024 ha ka ri Dominican Republic. Ha utei u snem la ïohi ruh ïa ka Riiohlang, kaba dei ka pulit kaba dang shakri ïa ka kam jong ka jylla Meghalaya, ba ka la shah jied kum ka nongpynïaid (official) ha ka lympung ïalehkai AFC U-17 Women’s Asian Cup ha Indonesia.
Ha u bnai Jymmang, 2025 ka la shah jied kum ka ‘Female Assistant Referee of the Year’ da ka AIFF na ka bynta ka samoi 2024-25. Nangta, ha u Nohprah, ka la long kawei na ki 40 ngut kiba la shah pynkup burom na ka bynta ka jingnoh synñiang sha ka phutbol Meghalaya ha ka jingïalang sam khusnam jong ka MFA ban sdang ïa ka jingrakhe dap 50 snem jong ka synjuk.
Baroh ki don haduh 19 ngut ki nongpynïaid jingïalehkai (match official) na India kiba la shah pynrung ha ka thup jong ka FIFA na ka bynta u snem 2026, ba kynthup ïa ki Referee, Assistant referee bad Futsal Referee, bad ka Riiohlang Dhar kadei kawei napdeng ki shiphew (10) ngut ki Assistant Referee kiba la shah jied.
