Shah jied ka Ribansi Jamu ha ka kynhun India na ka bynta ka AFC U20 Women’s Asian Cup 2026 ha Thailand
NEW DELHI, Lber 30: Ka Ribansi Jamu jong ka jylla Meghalaya ka la shah jied kum kawei na ki nongap kol jong ka kynhun phutbol U20 jong ka ri India ban ïakhun ïa ka AFC U20 Women’s Asian Cup 2026 ha Thailand.
ïa kane la pynthikna hadien ba u head coach Joakim Alexandersson u la pynbna ïa ka thup kynhun jong ki thei ïalehkai kaba don 23-ngut ki dkhot hynne ka sngi Nyngkong.
Ka India kaba la ïoh rung sha kane ka lympung hadien 20 snem kan sdang ïa ka jingïakhun jong ka pyrshah ïa ka Japan (02 tarik u ïaïong, ha ka por 6:30 ha Thammasat Stadium), bud sa ka Australia (05 tarik u ïaïong, ha ka por 2:30 ha Pathum Thani Stadium) bad ka China Taipei (08 tarik u ïaïong, ha ka por 2:30 ha Pathum Thani Stadium).
Ki ar tylli ki kynhun kiba wan hakhmat duh bad ar tylli ki kynhun kyrdan ba lai ba kham tbit tam napdeng baroh lai tylli ki Group kin ïohrung sha ka Quarter final. Shuh shuh, ki saw tylli ki kynhun ba jop ha ka Quarter Final kin pynthikna ïa ka jaka ha ka FIFA U20 Women’s World Cup Poland 2026. Baroh ki jingïalehkai jong ka AFC U20 Women’s World Cup Thailand 2026 yn pyni live lyngba ka FanCode.
Ki thei ïalehkai jong ka India ki la wanpoi ha Bangkok ha ka 20 tarik u Lber na ka bynta ka prokram pynkhreh, bad ki la ïoh por 13 sngi ban pynïadei ïalade bad ka jinglong jingman jong katei ka thaiñ. Nyngkong ka kynhun ka kynthup ïa 24 ngut ki nongïalehkai, ha kaba ka Alka Indwar, nongïalehkai ba shadien mynta ka la shah weng noh hadin ba u Alexandersson u la pynthikna ïa ka kynhun ba pura kaba don 23 ngut na ka bynta kane ka lympung.
Ka India ka la sdang ïa ka jingkilan met ban pynkhreh ha Bengaluru ha u bnai Kyllalyngkot hadien ba la pynkut ïa ka bynta ba nyngkong jong ka IWL. Hadien kata, ki la ïoh ïa ka prokram kilanmet kaba shibnai ha Sweden, ha kaba ki la ïalehkai san tylli ki jingïalehkai paralok pyrshah ïa ki klob ba la kham rangbah jong ka Sweden. Hadien ba ki la wanphai na Sweden, ka India ka la bteng biang ïa ka jingkilan met ha Kolkata shuwa ba kan leit sha ka nongbah jong ka Thailand.
Ka Ribansi ka dei shi bynta jong ka kynhun kaba la pynthikna ïa ka jaka lyngba ka U-20 Women’s Asian Cup Qualifiers ha u bnai Nailar ba la dep, watla kam shym la ïoh mih madan namar ba u Alexandersson u dang shaniah ïa ka kam ap kol ha ka Monalisha Devi Moirangthem. Hynrei man ka por ka Ribansi ka la ju don beit ha ka thup kynhun U-20 jong ka ri India ba la jied da u Alexandersson.
Watla katta ruh, ka Ribansi ka la ïoh katto katne ka por ban mih madan ïa ka India ha ka por ba ka kynhun ka la leit sha Kazakhstan ha u bnai Risaw na ka bynta artylli ki jingïalehkai paralok.