Shah jied ka NEIGRIHMS ban long ka RC na ka bynta ka Medical Educational Technologies

Shillong, Naitung : Ka North Eastern Indira Gandhi Regional Institute Of Health & Medical Sciences (NEIGRIHMS) , Shillong ka la shah jied bad pynbna da ka National Medical Commission (NMC) ban long ka Regional Centre(RC) na ka bynta ka Medical Educational Technologies (RC- MET) .
Ha ka 11 tarik mynta u bnai ka Dr. Aruna Vanikar, President jong ka National Medical Commission Under Graduate Medical Education Board kan plie ïa ka Regional Centre ha NEIGRIHMS. Kane ka Regional Centre for Medical Education Technologies (RC- MET) kan ai ki jinghikai ïa ki Doktor (ba sumar jingpang briew) kiba ai jinghikai ha ki jaka pule doctor ha thaiñ lam mihngi bad kiwei ki jaka jong ka Ri India ba la bthah da ka NMC.
Ha kane ka jingïalang, ka Dr. Aruna Vanikar kan pyllait ruh ïa ka kot ‘English-Khasi Translation In Medical Practice With Khasi-HIndi Transliteration And Phonetics’ kaba la pynmih da ka Department jong ka Medical Education bad ka jingïasynrop lang jong ki Doktor jong ka NEIGRIHMS.
Kane ka kot ka ai ïa ki ktien ba la pynkylla na ka phareng sha ka khasi ba ju pyndonkam da ki Doktor ha kine ki thaiñ ha ba ïakren bad ki nongpang bad kan long ka jingïarap shibun ïa ki ba pule Doktor bad ki nongtrei ka koit ka khiah ki bym kren khasi .
Kiba bun ki nongpang ki ba wan ha NEIGRIHMS ki ju kren kham bunsien da ka ktien Khasi bad ki ba wan pule doktor hangne ki don na kylleng ka Ri India bad kane ka kot kan long ka jingïarap kaba khraw ïa ki khynnah pule ki bym nang ban kren khasi ban ai jingsumar ka ba bha tam .
Da ka jingïalam lynti kaba tbit jong u Director ka NEIGRIHMS ,Prof. Nalin Mehta, uba dei ruh u stad bah ha ka Medical Education Technologies, ka NEIGRIHMS ka don ka jingkut jingmut ban un pynlong ïa ka jingthmu jong ka NMC ban pynmih ki Doktor kiba tbit bad ki ba pura ha baroh ki liang ym tang ha NEIGRIHMS hynrei ha ka thaiñ lam mihngi baroh kawei.
Ka jingshaniah jong ka National Medical Commission ia ka NEIGRIHMS ban leh ïa kane ka kam ba radbah ka long ka burom ym tang ïa ka NEIGRIHMS hynrei ïa ka thaiñ lam Mihngi baroh kawei. Kane ka long katkum u kyrwoh lyngba u Dr. Vikas Jagtap, Public Relations Officer NEIGRIHMS.