Shah jied haduh 20 ngut ki samla ha ka Jio World Convention, Mumbai da jingplie lad ka DBYC

Shillong, Nohprah 22 : Ka Jio World Convention Centre (JWCC), Mumbai, kaba dei kawei na ki jaka treikam kaba heh tam ha dewbah Asia ha kaba ju pynlong ïa ki jingpyni nam, ki jingïalang kiba heh, ki jingkynduh lang bad ki prokram bapher bapher ha ka Ri, ka la pynlong ha ka sien kaba nyngkong eh ïa ka rynsan pynrung kam ha Shillong da kaba ïatrei lang bad ka Emporium Skills Training Institute (ESTI–Shillong) kumjuh bad ka Don Bosco Youth Centre (DBYC), Laitumkhrah, Shillong, kaba la kylla long ka lynti ba thymmai na ka bynta ki samla wad kam ka jylla.
Baroh ki la don haduh 111 ngut ki samla na kylleng ki bynta jong ka jylla kiba la wan sha kane ka lympung bad dei hadien lai kylla ka jingbishar bniah la don sa 20 ngut ki samla kiba la bit la biang bad paka ban ïoh ïa kitei ki kam ha kaba la ai ruh ïa ka shithi jingtyrwa ïa ki hangtei hi. Kane ka sienjam ka la kylla long ka sien kaba kham pher ba kaba ai mynsiem namar watla ka dei ha ka sien kaba nyngkong pynban ka la long pat kaba jop.
Kine ki samla ba shah jied ki la ïoh ruh ïa ka jingtyrwa kaba heh bha ka jingsiew ryngkat bad kiwei kiwei ki jingmyntoi kynthup naduh ka jaka sah, ka leit ka wan, ka bam ka dih, ka insurance ïa ka koti ka khiah jong ki bad ka iing ka sem, ka tiket liengsuin haba leit bad kiwei kiwei ki jingmyntoi.
Kumta katkum ka jingkoit jingkhiah jong ki bad ka jingmynjur kaba la ïoh na ka kompeni, kine ki samla kin sa leit ban sdang trei noh ha Jio World Convention Centre naduh ka 19tarik Kyllalyngkot, 2026.
Ka jingjop jong kane ka jingpynrung kam ka dei ka jingmih na ka jingpyrshang kaba neh bad kaba pynleit jingmut bha da ka Don Bosco Youth Centre, Shillong, ka jaka pule Salesian kaba pawnam kaba aiti lut na ka bynta ka jingroi ba pura bad ka jinglah ban ïoh kam jong ki samla, khamtam kito kiba wan na ki longïing kiba duna ha ka liang ka ïoh ka kot bad ka imlang sahlang. Da ki phew snem, ka DBYC ka la don hakhmat eh ha ka jinghikai kam, ka jingpynroi ïa ki sap, ka jingïarap btin lynti ïa ki kam, bad ka jingpynrung kam, kaba ai bor ïa ki hajar ngut ki samla ha Meghalaya ban long kiba lah ban shaniah ha lade bad ki nongnoh synniang kiba khlain ha ka imlang sahlang.
Dang shen mynta u snem, ka DBYC Shillong ka la ïasoi ïa ka jingïateh kular bad ka ESTI, ka jaka ai jinghikai ïa ki kam kiba kyrpang ha ki kam Aviation, Hospitality, bad Cruise Line. Lyngba kane ka jingïatreilang, la hikai ïa ki samla na ki district bapher bapher jong ka jylla Meghalaya ha ki jingtbit kiba ïadei bad ka kam karkhana, ki soft skills, ka discipline, bad ka akor treikam, kaba pynkhreh bad pyntbit ïa ki ban don ïa ki kyrdan treikam kiba ka ri bad ka pyrthei ki donkam.
Haba kren ha kane ka sngi, u Director, Fr. Michael Makri u la pynpaw biang ïa ka jingangnud jong ki ban pyndap ïa ka jingïapher hapdeng ka pule puthi bad ka ïoh kam ïoh jam, khamtam eh na ka bynta ki samla kiba khlem kam khlem jam bad kiba duna ka lad. “Kane ka jingpynrung kam kam dei tang shaphang ki kam ;ka dei shaphang ka burom, ka jingkyrmen, bad ka lawei jong ki samla jong ngi,” u la ong.
Ka jingïatreilang kaba jop bad ka Jio World Convention Centre bad ka ESTI ka ieng kum ka jingpynshisha ïa ka jinglah jong ka Don Bosco Youth Centr ban ïaid ryngkat bad ki samla jong ka Meghalaya, ban pynkhreh ïa ki da ki sap, ki jinglong, bad ki lad ki lynti na ka bynta ka lawei kaba kham phyrnai bad kaba kham shngain.