Shillong, Nailur 20: Kumba 2 tylli ki shnong jong ka jylla Meghalaya ki la shah jied kum ki ‘Best Tourism Villages’ da ka Ministry of Tourism.
Ha kaba ïadei bad kane na ka liang ka shnong Umden kaba ha Ri-Bhoi bad ka Mawphlang kaba ha East Khasi Hills ki la shah jied kum ki Best Tourism Village na ka jylla Meghalaya ha ka kane ka snem 2024 Best Tourism Village Competition ha kaba ïadei bad ka Craft bad kyrdan Heritage.
Katba ka Shnong Umden ka la jop ïa ka craft category, bad ïa ka Mawphlang la ithuh kum ha ka kyrdan heritage category.
Ïa kane la ïathuh da u Myntri Rangbah u Conrad Sangma hapoh ka X, da kaba ong ba kine ki khusnam yn sa ai sha kine ki artylli ki shnong ha ka World Tourism Day ka ban long ha ka 27 tarik mynta u bnai ha New Delhi.
Lah ban ong ba na ka liang ka Ministry of Tourism ka la pyllait ïa ka jingïakob Best Tourism Villages ban burom ne ainam ïa ki shnong kiba lah ban khring ïa ki nongwan jngohkai pyrthei kiba long ruh ki shnong kiba lah ban pynneh pynsah ïa ka riti dustur bad kiwei ki kam kiba pynneh ïa ka sawdong sawkun bad kiba long ka bynta ruh ban kyntiew ïa ka ïoh ka kot ha ka imlang sahlang bad kiwei kiwei ki bynta.
Ha kane ka jingïakob ki la don kumba 8 tylli ki kyrdan kum ka Heritage, Agri Tourism, Craft, Responsible Tourism, Vibrant Villages, Adventure Tourism, Community-Based Tourism, bad ka Wellness.
