NEW DELHI, Naitung 11: Ka long ka jingsarong bad ka burom ïa ka Meghalaya baroh kawei ha kaba arngut ki thei ïalehkai phutbol jong ka Jylla ki la shah jied ban don bynta ha ka kynhun ïalehkai Under-20 ki kynthei jong ka ri India ka ban leit sha Uzbekistan na ka bynta ar tylli ki jingïalehkai paralok. Kine ki ar ngut kiba la shah jied ki dei kiba la tip kyrteng da ka Fragrancy Riwan bad ka Ribansi Jamu.
Baroh arngut ki ïalehkai na ka bynta ka kynhun phutbol jong ka Garhwal United, ha kaba ka Fragrancy ka ïalehkai shakhmat kaba paw bha ha ka jinglah ban thep kol, kynthup ïa ki san tylli ki kol ha ka jingïalehkai ha ka por ba dang ïaid ka Senior Women’s National Football Championship, katba ka Ribansi kadei ka nongapkol.
Ka kynhun ïalehkai phutbol Under-20 jong ki kynthei jong ka India kan ïakhun ar tylli ki jingïalehkai paralok ha Tashkent pyrshah ïa ki kynthei jong ka Uzbekistan U20 ha ka 13 bad 16 tarik Naitung, 2025, kum shi bynta ban pynkhreh ïa ka lympung ïaknieh rung (Qualifier) sha ka AFC U20 Women’s Asian Cup 2026, kaba la buh ban long naduh ka 01 tarik haduh ka 06 tarik u Nailar.
U coach jong ka kynhun uba na Sweden, u Joakim Alexandersson, u la pynbna ïa ka thup kyrteng jong ka kynhun kaba don 24 ngut ki dkhot ki ban mih na Bengaluru, ka jaka kaba ka kynhun ka la pynlong ïa ka jingpynkhreh, ha ka miet jong ka 10 tarik u Naitung bad ki la poi ha Tashkent ha ka step jong ka 11 tarik u Naitung.
Ka India kan ïakhun pyrshah ïa ka Indonesia (06 tarik u Nailar), ka Turkmenistan (08 tarik u Nailar) bad ka Myanmar (10 tarik u Nailar) ha Yangon na ka bynta ki jingïakhun ïaknieh rung (Qualifiers) jong ka AFC U20 Women’s Asian Cup. Ki lahduh jong ki Group ryngkat bad lai tylli ki kynhun kyrdan ba-ar kiba kynsai ha baroh 8 tylli ki Group kin ïohrung sha katei ka lympung ïalehkai ka ban long ha Thailand ha u snem ban wan.
Kane ka kynhun kaba don 24 ngut ki dkhot ka kynthup ïa ka nongap kol ka Monalisha Devi Moirangthem, kaba la don bynta lang ha ka kynhun ïalehkai ba rangbah kaba la pynthikna ïa ka jingjop kaba khraw ban ïohrung sha ka AFC Women’s Asian Cup 2026 ha Thailand ha ka taïew ba la dep. Ka la ïoh mih madan shisien ha ka Qualifiers bad ka la ïasoh sha ka prokram pynkhreh jong ka kynhun U20 ha ka 07 tarik Naitung hadien ba ka la wanphai na Thailand.
Nalor ka Monalisha kiwei pat kiba la ïoh ban kilanmet ryngkat bad ka kynhun ba la rangbah ha Bengaluru ki kynthup ïa ka Melody Chanu Keisham, Shubhangi Singh, Viksit Bara, Sulanjana Raul, bad ka Cindy Remruatpuii Colney, kaba dei shi bynta jong ka jingthmu kaba kham jylliew jong ka AIFF ban ailad mih madan kham bun ïa ki nongïalehkai naduh ka rta kaba dang rit.
Ka thup kynhun jong ka ri India na ka bynta ka jingïalehkai paralok pyrshah ïa ka Uzbekistan ki long kumne harum:
Goalkeepers: Melody Chanu Keisham, Monalisha Devi Moirangthem, Ribansi Jamu.
Defenders: Alina Chingakham, Cindy Remruatpuii Colney, Fragrancy Riwan, Juhi Singh, Nishima Kumari, Remi Thokchom, Sahena TH, Shubhangi Singh, Viksit Bara.
Midfielders: Anju Chanu Kayenpaibam, Arina Devi Nameirakpam, Bhumika Devi Khumukcham, Khushbu Kashiram Saroj, Monisha Singha, Neha, Pooja.
Forwards: Babita Kumari, Deepika Pal, Lhingdeikim, Sibani Devi Nongmeikapam, Sulanjana Raul.
Head coach: Joakim Alexandersson, Assistant coach: Paromita Sit, Goalkeeper coach: Hameed KK
Strength & conditioning coach: Karan Mane.
