Shah ïehbeiñ ka ïing skul ‘Padubah Govt. LP’, ym don shuh ba ïohi na ka liang ka sorkar

Jowai, Jymmang 01: Ka ‘Padubah Govt. L.P school Padu’ kawei na ki ïing skul kaba la rim bha hapoh ka thaiñ Amlarem War Jaiñtia kala shah ïehbeit shaba palat, khlem da don shuh ki bor ba halor ban peit bad ïohi ïa kane ka jingeh namar jingjot jingpra jong ka skul ha baroh ki bynta.
Kumba long mynta kane ka ïing skul kaba la buh jingeh ïa ki khynnah skul ban wan shong klas hapoh skul namar baroh ki ki tin ba tap ïa ka ïing skul kila pei lut, wat ki jingkhang, ki jaka leit bar jong ka ka skul kila jot la pra bad kane ka ïing skul kam long shu kaba biang ban pynlong skul namar ka aiom slap kala poi.
Na ka liang ka Hynñiewtrep Youth Council (HYC) War Jaiñtia Circle ka pynpaw ïa ka jingsngewsih kaba khraw eh halor kane ka jingshah ïehbeiñ jong katei kane ka ïing skul sorkar. Ka seng kala pynrem jur ïa u MLA ka thaiñ u ma Lahkmen Rymbui uba dei ruh u myntri ka pule puthi halor ka jingbym ïohi jong u ïa kane ka jingeh ka ïing skul wat la ka don hapoh ka Constituency jong u.
Shuh shuh kaba pynlyngngoh ïa ka seng ka long ‘balei ba ka ka sorkar kala peit khmat tang sha ki School shimet, ki School Aided’ da kaba theh ïa ki lad jingïarap shibuh shibun ban shna thymmai ïa ki ïing skul, katba ïa la ki jong pat kala leh klet kumba ym ïohi shuh bad kane ka pynpaw ïa ka jingtlot jong ka sorkar, la kynthoh jur ka seng.
Halor kane na ka liang ka HYC War Jaiñtia Circle ha ryngkat bad ka HYC Padu Unit, kan sa leit ban ujor ïa kane sha ki tyndong shkor jong u myntri ka pule puthi, kumjuh sha ka DSEO (Jowai) halor ka jingsngap mynthi ka sorkar na ka por sha ka por namar ïa kane ka jingeh jong katei ka skul LP la juh ujor da ki nonghikai hynrei haduh mynta ym shem la sngap satia ïa kane ka jingeh jong skul.