Nongpoh, Nailar 18 : Bun tylli ki Auto Rickshaw kiba kamai ha sor Nongpoh, ki la shah dain kuna ha ki Pulit ka tnad Traffic na Nongpoh, kaba dei halor ka jingpynkheiñ kyndon khlem da don License u Dribar bad khlem kot khlem sala ba bun ki kot ki sla ki la kut por khlem da pynthymmai.
Kane ka jingshah daiñ kuna ki Auto Rickshaw, ka dei mynta ka sngi ha ka jingpynlong ka tnad Pulit Traffic na Nongpoh ban khynra ne bat ia bun ki Auto Rickshaw kiba kamai ha sor Nongpoh ha ka jingkhynra kaba la pynlong ha surokbah ha jan ka Bethany Hospital Nongpoh.
Kane ka jingkhynra ki Pulit ia ki Auto Rickshaw, ka dei ruh halor ba ki Pulit ki la ioh jingtip ba bun ki Auto Rickshaw ki la shu kamai beain khlem da don ki Kot ki sla bad shi bynta ban ai jinghikai halor ka jingdonkam ban bud ia ki kyndon la pynlong ia kane ka jingkhynra na ka bynta ban tehlakam ia kito ki Auto Rickshaw kiba kamai beain hapoh ka sor Nongpoh.
Haba kren sha ki Nongthoh Khubor, u Rubul Ali, Officer In-Charge ka tnad Traffic, u la ong ba kum ka tnad Pulit ka ju pynlong ia ka prokram ai jinghikai sha ki kali paidbah na ka por sha ka por bad bun pat kim burom satia ia ki kyndon ha kaba hap ban pynlong kum kine ki jingkhynra kaba long kum ka jingai jinghikai ba ki hap ban bud ia ki kyndon jong ka aiñ ñiah Kali.
U la ong ruh ba ha kane ka jingkhynra la lap ba bun ki dribar kim don wat ia ki License bad kynthup ruh wat ki kot ki sla Kali bad halor kane ka jingpynkheiñ aiñ ki hap ban siew ia ka kuna katkum ka Motor Vehicle Act.
Shuh shuh, u la bynrap ruh da kaba ong, ban hikai ia ki Kali ba kamai paidbah, ka tnad Traffic kan dang pynlong bad bteng ka jingkhynra ia baroh ki Kali kamai ha sor Nongpoh bad kino kino kiba pynkheiñ ain kin nym lait ia ka kuna kaba dei katkum ka Motor Vehcle Act, u la bynrap.
