Nongpoh, Nohprah 01: Ban khang lad ïa ki kam dih kyiad bad ki kam shalan kyiad sha ki shnong ki thaw ha ka shnong Umkra ha Ri Bhoi District, ka seng Longkmie bad ka VDP ha ka janmiet jong ka sngi Saitjaiñ ki la ap dong ïa kawei ka Kali kit kyiad ha kaba ki la ioh kem bad ioh kurup da ki spah litar ka kyiad pyrsi.
Dei lyngba ka jingioh bat ïa kane ka Kali kit kyiad, hadien ba la pynlong ïa ka jingïatalasi ki la lap kumba 10 byrni ka kyiad ba la kot da ki spah litar kaba dei jong u Phias Laloo bad uba ñiah pat ïa katei ka Kali u de u Roibok Manih.
Na ka liang ki Longkmie bad ka VDP ka Shnong Umkra hadien ba la ioh bat ïa katei ka kyiad ki la aiti noh sha ka Synjuk ki Rangbah Shnong ki 22 shnong ha katei ka thaiñ bad mynta ka sngi na ka liang ka Synjuk ha ka jingïalam u Bah Mission Tron kum u President ki la tiar bishar na kitei ki 2 ngut bad ryngkat ka jingdain kuna halor kane ka jingshalan kyiad beain sha katei ka thian.
Ha kane ka sngi la don lang ruh u Bah B.K Tmung kum u Adviser ka Synjuk, u Bah Phaintis Syngkli kum u Secretary ha ryngkat ka jingdon lang u Rangbah Shnong Umkra bad kiwei kiwei ki nongïalam Shnong, ha kaba ym tang ba ki la dain kuna bad ki la mana tyngeh ruh ba lada ki dang lap nangne shakhmat kin leh da kaba kham tyngeh.
Hadien ba la ai jingsneng bad ryngkat ka kuna ïa kitei ki 2 ngut, ka synjuk ki Rangbah shnong ryngkat ka jingdon lang ka Dorbar Shnong Umkra, ka Seng Longkmie bad ki VDP ki la thang syndon ïa katei ka kyiad kaba long kum ka jingpyni da ka kam ba la khang pyrshah ban wan die kyiad sha kitei ki thain.
