Shah byrthen ki Managing Committee lada dang bteng ban khang ïa ki skul
Leit phai noh sha skul, kyntu u Myntri ïa ki nonghikai SSA
Shillong, Naitung 20 : U Myntri ka tnad Pule Puthi ka sorkar jylla, Bah Lahkmen Rymbui u la kyntu ïa ki nonghikai SSA kiba ïakhih mynta ha Parking Lot jong ka Additional Secretariat ba kidei ban leit phai noh mardor sha ki skul ba ki hikai lym kumta kim banse ban leh da kaba tyngeh.
Da kaba pynpaw ba ka sorkar jylla ruh ka ïakhun tyngeh na ka bynta ban pynïoh noh ïa ka tulop jong ki kaba dei ban wan na ka sorkar pdeng, u Myntri u ong ruh ba ki sngewthuh haduh kattno ka jingeh ba ki nonghikai ki kynduh namar ba ki shah set tulop bun bun bnai.
“Ngi la ïakhun ban pynïoh ïa ka tulop jong ki, watla kam dei satia ka kam kaba suk namar kane ka ka hap ha ka kti jong ka sorkar pdeng. Kumta ngi kyrpad ïa ki ba kin sdang leit shim klas noh bad lada kim kohnguh ngim banse ban pynmih ka hukum ba ‘no work no pay’ lane weng noh ïa ka grant na ka Managing Committee jong kito ki skul kiba khang wat hadien ba ka sorkar ka bteng ïa ka jingkyrpad,” ong u Myntri haba kren bad ki lad pathai khubor.
U Bah Lahkmen u ong ruh, ba ka jingbei tyngka ïa ka tulop ki nonghikai SSA haduh 90 persen ne 15,000 tyngka shibnai marwei kadei na ka sorkar pdeng katba 10 persen lane kumba 4,000 haduh 5,000 tyngka marwei shi bnai kadei ka bhah ba ju siew da ka sorkar jylla.
La ïathuh ruh ba ki nonghikai SSA la bunsien ki la wan ban ban kynduh ïa u kynthup ïa u Additional Chief Secretary ha kaba ki la dep ban pynsngewthuh ba ka sorkar Meghalaya ka la dep pynbiang lut ki jingdonkam ba buh da ka sorkar pdeng na ka bynta ban pyllait noh ïa ka pisa ha ka kylla kaba nyngkong.
“Ngi dang ap mynta bad bad mar ïa ïoh, ngin sa pyllait noh ïa ka tulop jong ki,” bynrap biang u Myntri da kaba kyntu ïa ki nonghikai ba kin leit phai noh sha ki iing ki sem kumjuh ruh ban sdang noh ïa ki jinghikai ha ki kamra klas.
Ha kane ka sngi, u Myntri u la ïathuh ruh ba katkum ka jingtip ba ki ïoh lum, ki skul kiba shah ktah na ka daw ka jingïakhih ki nonghikai kadei tang kumba 10 persen.
Lah ban kdew hangne ba ki don haduh 12,451 ngut ki nonghikai SSA ha baroh kawei ka jylla.