Shillong, Jylliew 3 : Ha ka miet 2 tarik por 9.30 ei ei uwei u khynnah uba dang 15 snem ka rta u la shah bom klep ha ki shi kynhun ki runar kiba ym lah ban ithuh kat haduh ba un da mynsaw jur bad poi hospital. Kane ka jingjia kala jia ha jaka ïeng taxi Lumparing ha Laban.
La ïathuh ba hynnin ka miet une u khynnah u la mih na ïing ryngkat bad u paralok da ka thuk thuk jongu ban leit thied jingthied bad kane ka long ha ka por 9.30 hynrei kyndit kyndit haba la poi ha katei ka jaka ki la shah bom klep bad namar ba ula mynsaw la pynkit ïa u sha Woodland Hospital bad hap thiah ha ICU.
La ïathuh ba kine ki runar ki don kumba 20 ngut ei ei. Une u paralok jongu u la ïoh ban phet krad bad leit pyntip mar mar sha ki pulit katba une u khynnah pat u la shah bom ha kitei ki kynhun runar na ki bynta ka khlieh.
Ki pulit ki dang pynlong ka jingtohkit bad thwet ban ioh kem ia kine ki runar.
