Shillong, Nailur 17: Ka khubor ba la ïoh na ki pulit la ïathuh ba ha ka janmied jong ka 15 tarik mynta u bnai, hadien ka jingïoh jingtip kaba thikna ki pulit ki la ïoh ban kem ïa arngut kiba ñiah thuk thuk kiba kyrteng u Waliul Islam bad la 23 snem ka rta bad u Abu Bakkar Siddik ba la 22 snem ka rta napoh ka shnong Khaprabari (WGH) ha kaba na ki la ïoh ban kurup ki dawai kuli kumba 1,953 tylli (Yaba tablet).
Ha kawei pat ka jingjia ki pulit ki la ïathuh ba u Cherak N Sangma jong ka shnong Lower Kharkutta (NGH) u la phah ka jingujor ba ha ka 11 tarik mynta u bnai, uwei uba kyrteng u Disu Marak u la shim ïa ka scooter jong u kaba don u nombar ML-13-9604 bad u khlem da la lah ban wan pynphai biang. Kham hadien utei u briew u la jah syndon khlem wan mih shuh.
Shuh shuh ki pulit ki la ïathuh ba u Tennybirth Ch Momin u la phah ka jingujor ba ha ka shiteng jong ka 14 tarik mynta u bnai ki runar bym lah ban ithuh ki la tuh ïa ka scooter jong u na Chipakgram, Mendipathar (NGH).
Ha kawei pat ka jingjia ki pulit ki la ïathuh ba u Coy Commander, G-Coy, ka 50th Bn., BSF (SWGH) u la phah ka jingujor ba ha ka 14 tarik mynta u bnai, ki shipai BSF ki la ïohi ba don ki briew kiba prong napoh ka jingker sainar shiah hapdeng ka India bad Bangladesh bad katei ka jingker sainar shiah kadei kaba don hapdeng ka BFL No. 20 and 21, Picket No. 1238 shaduh to 1239, BP No. 1072/22-T kaba dang hab hapoh ka BOP Kalaichar (SWGH).
