Shah bam shngiam ki ïing ha ka ding ba klang ha Geonka Compound, ïam briew ki paidbah

SHILLONG, K’Lyngkot 16: Ka ding kaba klang ka la bam shngiam ïa ki phew tylli ki ïing kiba don ha Geonka Compound, Anjelee na ka jingpluh ba kynsan kynsan kaba la jia ha ka janmiet sngi Thohdieng kumba ha ka por saw shiteng.
Ïa ka daw tynrai jong ka jingpluh kine ki ïing ha kane ka jaka ym shym la ïoh namar ba baroh baroh ki pulit ki dang bunkam ha kaba ïakhun ban pynlip ïa ka ding.
Katkum ka jingtip ba la ioh lum la ïathuh ba ka jingsdang ban kem ding kine ki phew phew tylli ki ïing kadei kumba ha ka por saw shi pawa ne saw shiteng eiei janmiet.
Tang tip ïa kane ka jingjia na ka liang ki pulit kila phone ïa ki kali pynlip ding bad kine ruh mar mar kila wan hynrei kim pat lah satia ban teh lakam namar ka jingklang jong ka ding bad kumjuh ruh na ka jingbthei ki hynriew tylli ki tyndong shet jingshet (gas).
Namar kane ka jingjia da ki spah ngut ki briew kiba shong basah ha kane ka jaka kila kylla long kiba khlem iing khlem sem namar ba ka ding kala bam duh lut ïa baroh.
Na kane ka jingpluh, ki don pat ki ïing kiba dang lait na ka jingjur jong ka ding kila ioh ka lad ban sei ïa ki tiar ki tar bad kumjuh ruh ïa ki jingdon jingem baroh bad kane kala wanrah ïa ka jingduh ba khraw ïa ki long ïing ki bym shym la ioh ban sei ïa ki tiar baroh.
Haduh ba la thoh ïa kane ka khubor ki la don haduh phra tylli ki kali pynlip ding ba kynthup ruh ïa ka jong ki shipai hynrei kim shym lah ban leh eiei bad na ka liang ki bor district ki dang pan shuh shuh ka jingïarap sa na ki shipai Air Force.
Ha kane ka janmiet kala kylla long ka jingïam briew ha kane ka jaka ïa kaba la sakhi ba ki long kmie bad ki khyllung khynnah kila ïam pangnud na ka daw jong kane ka jingshah bam duh ki ïing ki sem
Na ka liang u MLA ka thain uba dei ruh u Myntri Sorkar u Bah Sanbor Shullai tang shu ioh jingtiphalor kane ka jingpluh ïing mar mar u la wan ban peit ban khmih ïa kine ki briew kiba shong basah ha kane ka jaka.
Na kane ka jingjia ym shym pat la ioh jingtip ba haduh katno kane ka jingpluh ki ïing kala wanrah ïa ka jingjulor na ka bynta kane baroh.