Shillong, Rymphang 05 : U Nongialam ka United Democratic Party (UDP) bad Myntri Sorkar Bah Paul Lyngdoh ha ka sngi Balang ula buh jingkylli ïa ka Voice of the People Party (VPP) balei bad shaei jah rngai ka Article 371 na ka manifesto jong ka party ha kane ka elekshon Autonomous District Council (ADC) ka Ri-lum Khasi bad Jaintia.
Ka VPP ha ka manifesto jong ka elekshon MLA 2023, kala kular ban pynbor ïa ka Sorkar Pdeng ba kan pyntreikam lang ïa ki kyndon ai jingïada ba kyrpang ïa ka Jylla Meghalaya hapoh ka Article 371 jong ka Riti Synshar ka Ri India.
Kat kum ka jingong u Bah Paul, ka VPP hadien ba ka shah jied ha u 2023 kala dep ban wanrah ïa ka resolution ban pyllait noh ia ka Meghalaya naka Sixth Schedule bad ban pyntreikam da ka Article 371. Hynrei, ka UDP kan ïai bteng ban pynshai ïa u paidbah balei ba ka Article 371 kam dei ka lynti kaba biang ïa ka Meghalaya.
Haba jubab ïa ka jingkylli ha ka jingïakren bad ki nongthoh khubor, u Bah Paul ula ong ka Article 371 kala jah rngai na ka manifesto jong ka VPP ha kane ka elekshon ki District Council.
“Ka dei ka jingbatai kaba don bor bha bad da ka jingstad ha ka manifesto jong ka VPP. Nga sngew ba ki paidbah ki dei ban tip ïa kane. Phi (VPP ka kren halor ka Article 371) lah ban don kaei kaei na ka rynsan jong phi bad kane kajuh kala jah na ka manifesto jong phi. Ka mut beit ba ka don kaei kaei kaba ka party kam pat long shai bha bad nga ju ong ïa kane kum u nongïalam ba nyngkong eh phi dei ban don ka jingmut jingpyrkhat kaba shai” ula ong haba bynrap “Phim lah ban shu pyrshang ban rung ha ka jaka pdeng eh jong ka bor ha KHADC, dawa Article 371 bad hadien shim smai kum ki MDC namar phi hap bam smai ban bat ïa ka nongrim jong ka Sixth Schedule ïa kaba ka Article 371 ka kwah ban pyniap”.
Nalor kane, une u Nongïalam ka UDP ula ïai ban ïa ka jingpynbeit ka Sorkar Pdeng ba kino kino ki jaka kiba la treikam ka Sixth Schedule, kam don lynti satia ban pyntreikam sa ïa ka Article 371.
“Ka long kaba shai bha kumba shai mynsngi. Ka Sixth Schedule bad ka Article 371 kim lah ban ïaid lang ha kajuh ka jaka” ula ong.
U Bah Paul ula ai nuksa ïa ka Mizoram ban pynshisha ïa ka nongrim jong u bad ong “Ka nuksa kaba shai bha ka long ïaka Jylla Mizoram kaba treikam ka Article 371 ha baroh kawei ka Jylla lait noh ki lai tylli ki ADC, kiba la thaw ban peit ïa ka jingdonkam jong kiwei pat ki riewlum, kaba mut ba ki riewlum ha Mizoram, ki bym dei ki Mizo. Ka Mizoram baroh kawei ka hap hapoh ka Article 371 kaba mut ba phim lah ban don ïa ka Article 371 bad ïa ka Sixth Schedule ha kajuh ka por, dei ta ka daw ba la thaw ïa ki 3 tylli ki ADC ha Mizoram ban peit ïa ki jingdonkam jong ki riewlum ki bym dei ki Mizo ha ka Jylla Mizoram”.
Une u Nongïalam ka UDP ula pynkynmaw ruh ba ula pyrshah jur ïa ka resolution bala wanrah da u President ka VPP bad MLA ka Nongkrem Ardent Basaiawmoit ban pyntreikam ïa ka Artile 371 ha Meghalaya ha ka Dorbar ka ïingdorbar Thaw Aiñ ba long ha u snem 2015.
