Shillong, Naiwieng 12: Ka long ka khubor kaba sngewtynnat ïa ka jylla Meghalaya, ha kaba u Bah Hamiwell Marwein, ba shong ba sah ha Mawlai Mawroh, u la pyni ïa ka jinglong ryntih, ka jingkut jingmut bad da ka jingkyrshan kiba haïing hasem, u la lah ban pyndep pura shaduh kaba kut ïa ka jingïakob ba pawnam jong ka IRONMAN 70.3 Goa Triathlon, kawei na ki jingïalehkai ba jwat tam ha ka pyrthei.
Ka Ironman 70.3 ka kynthup ïa ka jingïakop jngi kaba 1.9 kilomitar, ka ñiah saikil kaba 90 kilomitar, bad ka jingmareh kaba 21.1 kilomitar — baroh la pyndep ryntih hapoh ka por ba la buh. Na ka bynta u Bah Hamiwell, kane ka jingïakop kam shym la long tang ka jingïakhun ha ka bor met, hynrei ka jingtynjuh ïa ka jingminot bad ka mon.
Ka jingïaid lynti jong u Bah Hamiwell ban poi sha ka thong ka long ka jingpynlut por bad ka jingtrei shitom kaba shi snem ban kilanmet, kaba pynïahap ïa ka jingim shimet jong u ryngkat bad ka jingsngewthuh kaba jylliew ïa kaei kaba u thmu. Ka jingpynshlur bad ka jinglam lynti ka la wan na u Colonel Jangvir Lamba, u Ophisar shipai India uba dang shakri, uba dei ruh u nongïalehkai Ironman ba la tbit bha bad u nongïamareh ba satar.
Haba kilanmet ban pynkhreh ha ki jaka lum jong ka Shillong, bunsien hapoh ka jinglong jingman ka suiñbneng kaba ym lah ban tip, u Bah Hamiwell u la pyni nuksa ïa ka jinglong ka mynsiem jong ka thaiñ shatei lammihngi — ka jinglah ban ïaishah, ka jingkhlaiñ kaba rieh, bad ka jingsarong ïa ka imlang ka sahlang.
Ka jingkyrshan bym lah pynkhih jong ka tnga jong u bad ka jingkyrshan ba man ka por jong ki khun kynthei jong u ka la kylla long ka nongrim ba kynja mynsiem kaba la tei ïa ka jingangnud jong u ban ïashim bynta bad pyndep ïa kawei naki jingïalehkai kaba jwat tam ha ka pyrthei, ka Ironman.
U Hamiwell u la bud ryntih ïa ka jingpynkhreh da kaba pynïasoh lang ïa ka por jngi, ñiah saikil bad mareh, ryngkat bad ka jingpynkhreh ïa ka bor pyrkhat kaba khlaiñ bad ka rukom im kaba ryntih. Ka khana jong u mynta ka long kum ka khubor kaba ai mynsiem ïa ki samla ka jylla Meghalaya — ba da ka jingaiti lut bad ka jingmut jingpyrkhat kaba dei, wat ki jingeh jong ka jingshah shitom ha ka pyrthei ruh ki hap hapoh.
Ka jingjop jong u Bah Hamiwell ka long ka jingpynshisha ïa kaei kaba ka jingai mynsiem, ka jingkyrshan jong ka ïing ka sem, bad ka jingpyrshang kaba ïai bteng ka lah ban pynïoh. U la buh ïa ka nongbah Shillong ha ka map jong ka Ironman.”
Ka jingpyndep jong u Bah Hamiwell Marwein ha ka Ironman 70.3 Goa ka ïeng kum ka dak jong ka jingkut jingmut, ka jingngeit, bad ka jingïadei kaba khlaiñ ha ka ïing ka sem — kaba pynshisha ba ka jingshah shitom kam dei tang shaphang ka jingkhlaiñ bor met, hynrei shaphang ka dohnud kaba kyntait ban ailad ban shah jop.
