H adien ba ka sorkar ka la ïohi haduh katno ki Autonomous District Council (ADC) hapoh ka jylla ki mad ïa ki jingeh namar kim lah ban siew tulop thikna sha ki Nongtrei jongki khamtam kum ka Jaintia Hills Autonomous District Council (JHADC) bad ka Garo Hills Autonomous District Council (GHADC) kiba pynsah tulop ïa ki nongtrei jongki da ki bun bun bnai. Kumta ka sorkar ka la wan shakhmat bad tyrwa ban ïarap song pisa thikna noh ïa ki ADC hapoh ka jylla khnang ba kin lah ban siew thikna ïa ka tulop ki Nongtrei jongki man la u bnai.
Mar ïa mih kane ka jingtyrwa khlem da bishar bniah ïa ki daw tynrai bad khlem da wad ïa ki jingshisha la mih ki jingpyrshah na ki seng bhalang , ki seng saiñ pyrthei bad kynnoh pynban ba ka sorkar ka thmu ban knieh ïa ka bor bad iktiar jong ki Council. Ha ka jingshisha kane ka dang dei tang ka jingtyrwa bad nalor kata ka sorkar ka la dep kren shai kdar hi ruh ba kam kwah tuklar ne mushlia ïa ka jingtreikam ki Council hynrei ka tyrwa namar ka ïohi bad i synnei ban peit ïa ki Nongtrei jong ki Council ba kim ju ïoh tulop da ki bun bun bnai bad kane ka buh ïa ki ha ka jingeh ban bsa bad pyndap ïa ki ïing ki sem jongki.
Hynrei hapdeng kine ki jingpyrshah hap ban ai ka jingïaroh bad ong shabas ko ki Nongtrei ba stad jongka GHADC namar ki la shim ïa ka rai ban pdiang ïa ka song jingïarap pisa ka sorkar khnang ba kin ïoh tulop man la u bnai. Kine ki la pdiang ym dei khlem da wad ïa ki jingshisha hynrei hadien ba la ïoh ka jingkular na ka Sub Committee bad khamtam na u DC uba khlieh ïa ka Sub Committee ba kane ka song jingïarap pisa ka sorkar ka long tang ban siew tulop ïa ki ka sorkar kam don bynta ban mushlia bad tuklar ha ki jingtreikam jong ki Council ne GHADC. Dei halor kane ka nongrim ba ki la rai ban pdiang ïa ka jingtyrwa jongka sorkar.
Ka jingkylli ka long hato ki Nongtrei ka JHADC bad KHADC kin pdiang ne em ïa kane ka jingtyrwa jongka sorkar. Hooid ha KHADC haduh mynta kim pat duh tulop kumba duh ki Nongtrei ka JHADC da ki bnai ki bnai lynter hynrei haba ka sorkar ka tyrwa ban ïarap ban ïoh tulop thikna hato kin kyntait mo ïa kane ka jingtyrwa. Namar ha kiba shu peit na bar te kim ïohi bad sngewthuh haduh katno ki Nongtrei ki Council ki mad jingeh ban bsa bad pyndap ïa ki khun ki kti namar ka jingbym ïoh thikna ïa ka tulop. Don napdeng jongki long ïing kiba hap ban duh noh ïa ki dkhot jongka ïing namar ym don pisa ban leit shim dawai haba ban ka jingpang jingshitom. Don kiba hap ban pynpep skul ïa ki khun namar ym lah ban siew ïa ka bai skul. Don kiba shu bam kyndoi jakpoh namar ym don pisa ban thied ïa u khaw bad ki jhur ki jhep bad kumta ter ter.
Hooid ban shu pynshit na sha lyndet ba kane ka jingtywa jongka sorkar ka dei beit tang ka jingthmu ban knieh ïa ka bor ka iktiar jong ki Council ka suk bha hynrei ka jingkyntu ïa kito kiba shu nang tang ban pynshit ba kin sngewbha ruh ban da tih bniah bad ban tohkit bniah na ki bor ba dei peit shwa ban pyllait ïa kino kino ki khubor kiba ïalam bakla. Yn nai da ïakren lei lei ïa ki Social Media kine ki shu kren beit kat shaba lap ba shem khlem da wad ïa ki jingshisha ki sngew ba ki jingkren jingkynthoh jongki ki dei kiba dei lut suda hynrei ha kiba tip ïa ki jingshisa kaei kaba ki social media ki kren bad kynthoh bad pynmih ka long ka bym shisha suda ki shu nang tang ban pynheh bad put turoi tang ban bun ki nongpeit khnang ban ïoh lum pisa bun man la u bnai kim ju pyrkhat jngai aiu kan jia lada ki kren lap lah katba lap ba shem.
Kumta kumba ki nongtrei ka GHADC ki la rai ban pdiang ïa ka jingtyrwa jongka sorkar nga sngew ban ai jingmut ba ki nongtrei jong ka JHADC bad KHADC ruh ki dei ban pdiang khlem kano kano ka jingartatien namar ki la dei ban sngewthuh shai ba ka sorkar ka la kren shai kdar ba kan ym mushlia ïa kita ki jingtreikam jongki Council hynrei ka shu wan ban ïarap song pisa khnang ba kin lah ban siew tulop ïa ki nongtrei ki Council man la u bnai khnang ba kin lah ban pynïaid beit pynïaid ryntih ïa la ki jong ki ïing ki sem.
