K a jingleit jngoh jong u Myntri Rangbah ka jylla u Conrad K Sangma, u Symbud Myntri Rangbah bah Prestone Tynsong bad u Myntri ka kam jngohkai u bah Paul Lyngdoh, ki Ophisar, u Syiem ka Hima Mylliem bad ki Myntri jongu ïa ka ïewduh mynta ka sngi wat hapdeng ka jingjur u lapbah ka la dei ka sngi ban sah jingkynmaw ha ka histori jongka ïewduh namar ka dei ka sien ba nynkong ba ka ïewduh kan ïoh ban wan jngoh da kitei ki kynrem ki lyndan naduh khlieh iew haduh trai ïew lah ban ong. Hooid ym lah ban len ha ka por ba u Dr Mukul Sangma u long u Myntri Rangbah u la wan jngoh tang na khlieh ïew hynrei mynta ka Sngi u Myntri Rangbah lem bad ka Kynhun jongu ym tang ba ki leit narud narud ki da rung shapoh ïewduh sha man la ki basa bad kaba i tynnad lei lei ka long hadien ka jingleit jurip ki leit ruh sa ban ïa bam jadoh hapoh basa ja. Ka jingpynlut por kam duna ïa ka lai kynta tam.
Nalor kata kam kut tang katta hynrei u la kular ruh sa 15 klur tyngka ka song pisa ban ïarap pynbha shuh shuh ïa ka ïewduh. Lada beiñ sa katno katno ruh lah ban ong ym pat don sorkar hapoh ka jylla kaba lah ban trei kum kane ka sorkar MDA hapoh ka jingïalam ka NPP bad u Myntri Rangbah ka jylla u Conrad K Sangma. Kumba kren da ka ktien ki leh ruh da ka kam. Lada phai sha ka liang ka pule puthi ruh ka sien ba nyngkong mynta u snem ban pass bha ki khynnah bad ym tang katta la jan baroh ki skul kin ïoh ïa ka skhim ban pynbha bad pynwandur ïa ki skul hapoh ka jylla. Nalor kata dei kane ka sorkar kaba nud ban shim rai ban plie iïa ka University jongka jylla. Dei ruh kane ka sorkar kaba shim khia ban pynïoh ïa ka Shillong Engineer College. Lada phai sha ka koit ka khiah ym tang ba ka sorkar ka pynleit jingmut tang ha ki hospital sorkar ne ki CHC, PHC ne ki Sub Centre hynrei mynta u Myntri Rangbah lyngba ka skhim ba kyrpang jongu u la ïarap pisa mar ar klur ïa ki private hospital hapoh ka jylla. Shuh shuh lada phai sha ka liang ki surok ki lynti ki syngkieng ruh la bun kiba bha bad ki bym pat bha ruh ki la rung ha ki skhim bad don ruh kiba ka jingtrei ka dang ïaid shakhmat.
Ym tang katta lada phai shuh shuh ïa ki jingtreikam jong une u Myntri Rangbah u dei uba nyngkong ban hiar da lade sha ki paidbah sha man la ki block ban kylli mar khmat na ki paidbah halor ki skhim bad kumjuh ruh ba ki ophisar kin hap ban ai ka jubab hangto hangto hi lada jia ba kim pat pyntreikam ïa ki skhim. U long da shisha u Myntri Rangbah uba sngewrit bad uba ki paidbah ki lah ban ïakynduh bad ïakren markhmat. Ka jylla kam pat ju ïoh Myntri Rangbah uba kum une . Ym tang katta wat ki Myntri sorkar ruh kim kiar haba ki paidbah ki wan ban ïa kynduh ha kano kano ka por. Kim peit satia ba ki ïa kynduh tang ïa ki briew napoh ka constituency hynrei kin ïa kynduh lut ïa baroh kat kiba wan sha ki.
Ha kane ka jingleit jurip mynta ka Sngi ha ïewduh, naduh u Myntri Rangbah, u Symbud Myntri Rangbah bad u Myntri kam jngohkai ki la ïoh ban iakren markhmat bad ki paidbah nongshong ïew bad wat kiba wan siew sha ïew ruh. Na kane ka 15 klur ka pisa ba u myntri rangbah u la kular ban ïarap, ka thong ka long ban pynbha ïa ki nala, ban btep shapoh ïa ki pipe um khnang ba ki paidbah kin suk ban ïaid ban ïeng haba ki wan ïew ban lait na kino kino ki jingmynsaw. Lah ruh ban kdew hangne ba khlem jingsalia ïa u slap bad ki um ba tuid u Conrad bad u Bah Prestone lem bad u Bah Paul Lyngdoh kila niom naphang wat hapdeng ka jingther u slap kila ïaid beit sha khmat ban jurip ïa ka ïew bad na ka jingther u slap u Conrad la ïohi ruh u u la kup da ka knup.
Kumta bun bha kiba kane ka sorkar MDA hapoh ka jingïalam ka NPP ka la leh bad ki paidbah ki dei ban bishar bniah ïa ki kam jongka ym ban shu kynnoh bad shah pynbiej ne shah ïalam bakla. Da bishar bniah wat ym shah pynthame ha ki sur ne ki ktien ba bang ba thiang jongno re ïoh babe kylla hadien.
