Shabar Jylla kwah leit shang suwari ki heprit 11 snem na ka shnong Tiehsaw

Nongstoiñ, Naitung 26: Tang hadien katto katne por jong ka miet jong ka 25 tarik Naitung 2024, ba la pyllait ïa ki khubor ba ar ngut ki heprit kata u Aibantei L.Marshiangbai 11 snem, khun jong u Bah Lubeti Sohshang bad uwei pat u ba la tip kyrteng u Hamebatskhem Marweiñ 11 snem karta, khun jong u Bah P.Hoojon, kiba dei na Tiehsaw ki la shu jah rngai ha ka step jong kane ka sngi naduh ka por 4:30 ei ei, ha ka por ba ki leit mareh step. Hynrei la don pat ki nongshong shnong ka Sohpian kiba la ïohi ïa kitei ki khynnah bad mar mar ki la pyntip noh sha ki pulit.
Ha ka jingwad ha katei ka shnong ryngkat ki nongïalam shnong lem bad kiba haïing ha ka por mynmiet, la lap ïa kitei ki khynnah kiba la ïoh thiah pynban paiñkhana kaba don ha lyndet ka ïing mane ka balang Catholic kaba don ha kane ka shnong.
Ha ka jingwad bniah balei kine ki khynnah rit ki jah, la shem ba ka dei ka daw ka jingïoh pisa 2500 tyngka. Na ka jingïathuh u kpa jong u Aibantei la ong ba man ka step kine ki ar ngut ki shait leit mareh step. Hynrei lyngngoh ba ha ka step jong ka 25 tarik ki khlem wanphai shuh wat haduh ka por leit skul. Hynrei ha ka jingkylli tohkit da kiba haïing na kiwei pat ki khynnah, ki la ong ba ki kwah ban leit kai suwari noh sha Dkhar.
U la ïathuh ruh ba kitei ki ar ngut ki la ïoh da ka pisa jong ka kmie bad da katei ka pisa ki thmu ban leit kai sha bar jylla. U la ong ruh ba haba ki la leit wad sha steshon kali, hynrei don pat kiba ïohi ba ki ïaid da ka kjat sha ka surok ban leit sha Shillong.
La ong ruh ba mar ïa poi ha Porsohsat ki la leit shwa sha kawei ka pung kaba dei ka jaka jong ka Sylleiïawkheiñ bad ki la pynlut por hangtei baroh shi sngi. Ha ka por janmiet pat ki la leit bam ja ha katei ka dukan kaba don ha ka shnong Sohpian bad namar kim tip shuh shaei ban leit, kumta ki la leit ban thiah noh ha katei ka paiñkhana jong ka ïing mane balang catholic.
Da ka jingïatreilang ki paidbah, ki VDP shnong Sohpian, na ka tnad pulit bad kumjuh na kiba haïing hasem bad na ka shnong Tiehsaw kiba la wad ïa kitei ki khynnah, la lah ban ïoh pat ïa kitei ki khynnah kiba ïoh thiah ha katei ka paiñkhana ha Sohpian. La lap ba ki la kum da ka shawl ba rah na ïing bad syngkhlieh pat da ki pla ba ki la thep ïa ki jaiñ phong, kum ka jingkhreh ban leit sha bar jylla.
Hynnin hi ka miet la rah noh pat sha Civil Hospital na ka bynta ban phah sumar bad pyndep na ka bynta ki jingdonkam, shwa ban sa ai ti noh pat sha kiba haïing hasem.