Sha u Sanjay Seth pynpaw u Bah Sanbor halor ka jingkiew dor ka bai wai jaka ha Cantonment

Shillong, K’Lyngkot 28 : U MLA ka 19 South Shillong uba dei ruh u myntri sorkar ba peit ïa ka tnad Lariti u Sanbor Shullai u la pynpaw ïa ka jingsngewkhia halor ka jingpynkiew dor palat ïa ka bai wai jaka hapoh ka Shillong Cantonment Area bad u la buh jingkylli ïa ka jingpynkhein ïa ka hok ban ïa ryngkat haba ïa nujor bad ki jaka ba marjan jong ka Municipal.
U Bah Shullai u la pynpaw ba ym lah ban don ar tylli ki rukom siew khajna bapher bapher na ka bynta ka Cantonment bad ka Municipal.U Bah Sanbor Shullai u la ïalam ïa ka kynhun ki nongialam ka BJP ha ka jingleit jong u dang shen sha New Delhi.
U la ïakynduh ïa u myntri khynnah ka sorkar kmie ba peit ïa ka Defence u Sanjay Seth bad ïa ka Shoba Gupta kaba dei ka Director General of Defence Estate ha kaba u Shullai u la aiti ïa ka jingai jingmut ha kaba ïadei bad ka jingkiew khajna kaba khlem thikna ha ka Cantonment Area kaba la wan hadien ba la pyntreikam ïa ka policy ba shipor.
U Bah Shullai ha ka jingthoh u la kyrpad ïa ka tnad ban pynkylla ïa ka interim policy bad ban pyntreikam 25% na ka STR ba la khein na ka bynta u nongshim wai ba la don lypa.U Bah Shullai u la pynpaw ba namar ka jingkiew dor palat ka bai wai ïing kane ka kam ka dang sahkut ha Supreme Court bad ki ïingbishar High Court bapher bapher ha kylleng ka ri.
Shuh shuh u Bah Shullai u la pynpaw ba ka sorkar ka dei ban thaw ïa ka polisi kaba bniah kumta ba ka bai wai kan long kaba ïa ryngkat bad ka jaka ba marjan jong ka Municipal.
Ka kynhun ha ka jingïakynduh jong ka bad u director kila kyrpad ban pyntreikam kloi ïa ki building bye laws bad ruh ban pynkloi ban mang pisa ïa kawei ka top pynlang um kaba lah ban ngiam 6 lak liter ban pyndap ïa ka jingdonkam ka Shillong Cantonment.
Shuh shuh u Bah Sanbor Shullai u la khot sngewbha ruh ïa u myntri sorkar ban wan plie ïa u maw nongrim na ka bynta ki projek bapher bapher ki ban dang wan ki ban long kiba nyngkong eh ha ka histori jong kane ka thain cantonment. U Bah Shullai u la pynpaw ba u myntri khynnah ka sorkar pdeng u lah ban wan sha Shillong ha u bnai Rymphang.
U Shullai u la ai ksai ruh ba ka kynhun jong ka BJP ka lah ban ïakynduh ïa u Myntri Rangbah duh na ka bynta ban pyntreikam sted ïa ki polisi namar ba ka jingmynjur jong ka kynhun myntri ka long kaba donkam, kumba la ïakren bad ki bor jong ka defence.