Sha u Myntri Rangbah ujor ki 2 ngut ki nongkhaïi mawshun ïa uwei u briew uba ïoh bun ki Challan tangba um don par

Shillong, Iaiong 12 : Arngut ki Nongkhaïi Mawshun sha Bangladesh kiba kynthup ïa u bah Shemphang Lakashiang bad ka kong Deng Lamare kiba don ïa ka Laisen Major ban tih mawshun ha Amlari bad Nongtalang ki la phah ïa ka jingujor sha u Myntri Rangbah ka jylla u Conrad K Sangma halor ka jingïoh Challan bun ban shalan maw shun u bah Dainiel Khongsit u bym don wat tang kawei ruh ka par mawshun ha West Jiantia Hills District.
Ha kane ka jingujor da kitei ki ar ngut ka long ba kumno la ai ïa ki challan Mawshun kiba la tip kum “Major Incidental Transport Challan sha u bah Dainiel Khongsit ban shalan mawshun sha Bangladesh 6000 metric ton na kad khaïi Dawki kaba hap hapoh jong ka Amlarem Sub Division,
Ha ka jingujor la kdew ba naduh ka 23/Kyllalyngkot/2026 haduh ka taiew ba nyngkong u bnai Lber 2026 ki nongkhaïi na West Jaintia Hills namar ka jingbym don challan tang ban bteng ka kam ki la shim ïa ki challan na East Jaintia Hills da kaba kren shai kane kan long tang shipor.
Ha ka jingujor kaba la phah sha u myntri rangbah la ong ba kam shym don kano kano ka jingai jibit da ki bor ba dei peit ban ai ha u bah Dainiel Khongsit ban ai ïa ki challan Mawshun 6000 Mt, ka jingshisha ka long ba um don par mawshun ha West Jaintia Hills District.
Ha kane ka jingujor la thoh shai ba ki challan dewiong kiba la pynkylla sha ka challan Mawshun kane ka dei ka jingkylli kaba long pyrshah bad kane ka jingleh kan ktah ïa ki briew kiba don ia ki challan kiba dei na West Jiantia Hills.
Kane ka jingleh kan ktah ïa ka jingïoh ka sorkar jylla. Kine ki ar ngut kiba la phah ïa ka jingujor ki dawa ban phah tohkit ïa kane ka jingai challan 6000 Mt khlem da don ka par mawshun, la kyntu ïa u myntri rangbah ban leh ei ei ban ïoh ia ka khaïi pateng kaba khuid, ïa kane ka jingujor la phah ha ka 11/Iaiong/2026 sha u myntri rangbah ka jylla.