Sha u Myntri pyntip u rangbah bym siew ki karkhana ïa ka bai bylla katkum ka Minimum Wage

Shillong, Nailur 29 : U wei u Rangbah na Mynkre East Jaintia Hills ba tip kum u Bah W Nongtdu u la pyntip sha u Myntri ka tnad Labour ka sorkar jylla Bah Methodius Dkhar halor ka jingbym bud pyrkhing ki karkhana bad kompeni bapher bapher ïa ka dor bai bylla ba la buh da ka tnad Labour ne ka Minimum Wages.
Ha ka jingïakren bad ki lad pathai khubor hadien ka jingkynduh ïa u Myntri na ka liang u Bah Nongtdu u la ïathuh ba u la pyntip ha u Myntri ba ki don bun bha ki karkhana bad kompeni ha East Jaintia Hills ki bym pyntreikam ia ka jingsiew kumba bthah ka sorkar.
“La ïathuh da ki nongtrei hi ba ka jingsiew ïa ka bai bylla kaba ki ïoh kam ïahap satia bad ka jingsiew kaba rit tam kumba la pyntip da ka tnad Labour,” u la ong.
Shuh shuh u la ïathuh ba na ka liang u Myntri u la pyntip ba ka bai bylla ba ka tnad Labour ka bthah ban pyntreikam ka long 525 tyngka shisngi na ka bynta ki nongbylla unskilled lane ki bym pat da nang bha. U ong ruh ba ka bai nongtrei na ka bynta ki nongbylla kiba la kham tbit ne semi skilled ka bainong ba la buh ka long 565 tyngka shisngi.
La ïathuh ba na ka bynta ki nongbylla ba la tbit ne ki skilled ka bainong ba la buh ban siew ka long 605 tyngka shisngi katba na ka bynta kito kiba la tbit bha pat ne kita ki highly skilled ka jingsiew ka long 645 tyngka shisngi.
“Kumta ka jingbym ai ïa ka bai bylla katkum ka dor ba la buh da ka Sorkar ka long kum ka jingpynkhein beit ïa ka hok jong ki nongtrei jylla kaba la buh ban peit na ka bynta ka bha ka miat bad ka jingïada ïa ki nongbylla,” u la ong.
Ha kajuh ka por u la ïathuh ba na ka liang u Myntri u la kular ban shimkhia ïa kane ka bynta namar kane ka ktah ym tang ïa ki nongbylla kiba dei na rilum Jaintia hynrei ïa ki nongbylla jong ka jylla hi baroh kawei.
Shuh shuh la ong ba u Myntri u la kular ba dalade hi un hiar ban leit jurip khnang ban lap ïa ki jingshisha baroh bad ruh ban pyntikna ïa ka jingpyntreikam hok ïa kane ka dor bai bylla ba la buh da ka sorkar.