Sha u myntri ka sorkar pdeng ai jingthoh u MP ka Shillong ban ym ithuh ïa ka Public Hearing ka Shree Cement

Shillong, Rymphang 14 : U MP jongka Shillong Parliamentary Constituency u Dr Ricky AJ Syngkong u la ai da ka jingthoh sha u myntri ka sorkar pdeng uba dei peit ïa ka tnad Environment, Forest bad Climate Change u Bhpender Yadav na ka bynta ban ym ai bor ne shah ïa ka Shree Cement Ltd ban seng ïa ka karkhana ha ka shnong Daistong, East Jaintia Hills da kaba ong ba ka Public Hearing kaba la dep pynlong kam long kat kum ki lynti ka aiñ bad nalor kata lada seng ïa kane ka karkhana kan ktah ym tang ka tdem hynrei wat ïa ki jaka puta jong ki trai ri trai muluk ruh.
Ha ka shithi u la pynpaw ba dei ban pynsangeh mardor ïa kane ka kam katba ym pat dep bishar bniah ïa ka Public Hearing kat kum ka 2006 EIA Notification, ban ïaid ki jingpynshisha kat kum ka Sixth Schedule bad kumjuh ruh ka Meghalaya Transfer of Land (Regulation) Act 1971.
“ ïa ka public hearing la pynlong ban ïoh ïashim bynta ki paidbah shwa ban ïoh kino kino ki jingmynjur na ka sorkar pdeng bad lada don kano kano ka jingkynnoh ba ka don ka jingpynkheiñ kyndon donkam ban ïaid da ka jingbishar bniah shwa ban pynïaid shakhmat ïa ka kam” ong u Dr Syngkon.
Ki trai shnong Daistong ki la ai da ka jingthoh sha u Myntri Rangbah duh ka ri u Narendra Modi bad sha u Myntri kam pohïing ka ri u Amit Shah ban pyntip ba ka Dorbar Shnong ka la ai ïa ka NOC bad ïasoi ïa ka soskular bad ka kompani khlem ka jingtip jong ki paidbah. Nalor kata ki la ong ba kane ka karkhana ruh ka don hajan ka krem Laitprah-Labit kaba dei ka krem ba jrong tam ha Asia bad kaba bun bah ki dohkha shapoh krem.
U Dr Synkong u la pynpaw shuh shuh ba kane ka karkhana kaba 0.95 mtpa clinker unit bad 0.99 mtpa cement unit kaba donkam ruh palat ïa ka 25 hectares ka jaka lada ïaid shakhmat khlem ka jingshai ki paidbah ka khring ïa ka jingïakhih pyrshah ki paidbah.
Kum u MP jongka Constituency lada leh bym suidñiew ïa kane bad pynïaid shakhmat un rah ïa kane ka kam ym tang ha Parliament hynrei da kiwei kiwei ki lynti ka aiñ ruh. “ Hynrei nga kyrmen skhem ba kan ym poi haduh uta u pud namar nga ngeit skhem ba ka tnad ngan sngap ïa kane ka jingpyrshah ki paidbah bad na nga ruh kum u MP ruh” ong u Dr Syngkon.
Kumta u kyntu ïa ka tnad ba dei peit ba kim dei ban ai kano kano ka jingbit khlem pat da shai kdar ki paidbah bad khlem da bishar bniah ïa ka kam.