Sha u Myntri ai jingthoh ki nongtrei casual MeECL bad kyrpad pynkiew ïa ka bai nongtrei

Khliehriat iaiong 27: Ki nongtrei Casual jong ka tnat MeECL kiba hapoh ka shatri jong ka MeECL Progressive Workers Union, myn ha ka 20 tarik mynta u bnai ki la leit ban buh da ka jingthoh ha khmat u Myntri ka Tnad Labour, u bah Sanbor Shulai ha kaba ki la kyrpad ban pynkiew noh ïa ka bainong jong ki bad ban kyn thup lang noh ïa u President bad u Secretary jong ka Union ban long ki dkhot ha ka Minimum State Advisory Board.
Katkum ka shithi ba la soi da u President jong ka MeECL Progressive Worker’s Union, u bah Mantipphrang Lyngdoh bad ka Secretary ka kong Angelina Hynniewta, ki la kyrpad na utei u myntri ba un sngewbha ban un buh noh ka jingpynbna ban pynthymmai ïa ka bainong naduh u bnai lber bad u bnai nailur man la u snem khnang ba la tnat Labour kan dup lah ban phah jingtip sha baroh ki tnat ba kin pyntreikam ia kane ha ka por ba biang ban dup lait na kaba siew arrears ïa ki nongtrei casual ka tnat MeECL.
Kumjuh ruh ki kyrpad ban pynbna ha ki pathai khubor na ka bynta ka jingtip lang jong baroh, lane ban buh ha ki web site jong ka tnat Labour khnang ba ka tnat kan dup lah ban pyntreikam ïa ka jingpynbna.
La ong ruh ba katkum ka Minimum Wage Act 1948, ka sorkar ka lah ban pynthymmai ne peit bniah ïa ka jingsiew bainong, ki la kynthoh ruh ba kumba baroh ki tip ba na ka daw ka khlam ka la don ka jingkiew dor ki mar ki mata ha ki ïew ki hat, kumta ki la kyrpad ïa ka sorkar lyngba u myntri, u bah Sanbor Shulai ba kan sngewbha ban pyrkhat lem ban pynkiew ïa ka bainong trei naduh u bnai risaw kata na ka T510 sha ka T650 tyngka na ka bynta ki Unskill bad T 580 sha ka T 720 na kabynta ki semi skill.