Sha u DC ujor ka FKJGP ba mad jingeh ki khynnah skul JNV Ñiangbari, dang ap ïa ka kaiphod na PHE bad Food Inspector

Nongpoh, Naitung 31: Ka seng Federation of Khasi Jaiñtia and Garo People (FKJGP), North Khasi Hills District mynta ka sngi la leit ban buh syndon da ka dorkhas sha u Deputy Commissioner ka Ri-Bhoi District halor ka jingeh ba mad da ki khynnah skul ka JNV ñiangbari hadien ba ka seng kala leit jurip bad lap hi da la ki jong ki khmat ïaka jingeh bad jingjynjar ba mad da ki khynnah skul ha katei ka skul, ha kaba naka liang ka seng kala bsuh lang ruh ïaka jingujor sha u DC bala thoh bad soi hi da ki khynnah skul bala aiti sha ki dkhot ka seng.
Kum ban shu pynpaw ba ka seng FKJGP kala leit ban jurip hi ban jurip hi ïa katei ka skul haka 26 tarik mynta u bnai hadien ka jingujor na ki khynnah skul bad ki kmie ki kpa, hadien ba kila don ruh ki khynnah kiba kem pang naka jingdih ïaka um jaboh bad long kum ka rong sha dud kaba katei ka skul ka ai bad pynbiang sha ki khynnah ban sum ban sait bad ban dih bad kumjuh ruh ki jingujor halor ka bam ka dih kaba la sniew kaba ki khynnah ki ioh na katei ka shlem pule jong ka sorkar.
Haba kren sha ki lad pathai khubor naka liang u Bah Ricky Majaw Information Secretary ka seng haka jingdonlang u Samla Gabriel Sun Education Secretary bad u Samla Precious Khymdeit, Secretary ka Nongpoh Circle u la ong ba hadien ka jingleit ïakynduh ïa u DC ka Ri-Bhoi, naka liang u DC u la kular ban shimkhia ïa katei ka kam ha kaba u la pyntip ruh ba u la dep ban phah pynlong ka jingtohkit haki Magistor bad u dang ap ruh ïaka kaiphod naka tnad PHE bad Food Inspector halor katei ka jingjakhlia ka um ba ki khynnah skul ki hap bad dih bad kiwei kiwei ki jingeh ba mad da ki khynnah skul kumba kala paw pyrthei hadien ba kila don ruh ki khynnah kiba kem pang bad leit sha ki jaka sumar bad don ruh kiba la leit phai shala ïing.
U Bah Ricky Majaw u la pyntip ruh ba u DC ka Ri-Bhoi u pan por kumba 1 taiew ban pyndep ïaka jingtohkit halor katei ka jingeh ba mad da ki khynnah skul ka JNV Ñiangbari ban pyndep ïaka jingtohkit bad ban ioh ïaka kaiphod ba pura.
Naka liang u Deputy Commissioner ka Ri-Bhoi District u Arpit Upadhyaya haba kren sha ki lad pathai khubor u la ong ba tang hadien ka jingioh jingtip halor katei ka jingjia u la phah ïaka kynhun ki majistor ban pynlong ka jingtohkit mar mar kumba u la iohi lyngba ki dur bad ki video kala long shisha kaba isaitmet ban peit halor ka um kaba ki khynnah ki hap ban dih kaba lah ban ktah shisha ïaka koit ka khiah bad buh jingma ïaki khynnah skul bad naka liang jong u u dang ap ïaka kaiphod naka tnad PHE, Food Inspector hadien ba kila leit ban pynlong ka jingtohkit sha katei ka skul, bad ha kaba ïadei bad jingdonkam naduh ki paiñkhana, ki jaka sum bad kiwei kiwei, ki bor bahalor jong ka JNV ki dei ban shimkhia mardor ban pynthikna ba ki khynnah kin ioh ka jaka sah, ka bam ka dih bad ka mariang kaba khuid ha kaba kum u DC ka Ri-Bhoi un sa leit.
Ha kaba ïadei bad ka jingujor jong ki khynnah halor ka jingbym wan thikna jong u Principal sha ka skul naka liang u DC u la kular ban phah tohkit ban lap ïaka jingshisha bad kumjuh ruh ki nonghikai bad lada lap yn sa shim da ki sienjam kiba tyngeh.