Nongpoh, Naitung 15: Halor ka jingthmu ka sorkar Assam ban pyntreikam ïa ka skhim sam bording sha ki shnong ha Block II ba hap ha ka Raid Nongtung ha Ri Bhoi, ka Synjuk ki Rangbah Shnong Raid Nongtung Border Area ryngkat ka KSU Eastern Border Area mynta ka sngi ki la leit syndon ban ujor sha u Deputy Commissioner ka Ri Bhoi ban tuklar halor kane ka kam ha kaba ka jingthmu ban pyntreikam ïa katei ka skhim sam bording ha ka shnong Sabuda ba hap ha ka Raid Nongtung ka dei kaba khlem da pyntip sha ka bor shnong bad ruh wat sha ka sorkar Meghalaya.
Ka Synjuk ki Rangbah Shnong Raid Nongtung Border Area ha ka jingïalam u Chairman, u Bah Blikshon Sohtun bad ka KSU Eastern Border Area, ha ka jingïalam u President, u Bah Banjop Maring ryngkat ki nongïalam ka KSU Sabuda Unit ki la leit ban ujor sha u Deputy Commissioner ka Ri Bhoi pyrshah ïa ka jingthmu ban pyntreikam ïa ka skhim sam bording ha Sabuda, ka dei hadien ba na ka liang ka sorkar Assam lyngba ka tnad sam bording ka Assam na West Karbi Anglong ka la wan ban pynhap ïa ki Post Ilektrik ha ka 13 tarik u Naitung 2022 ha ka Shnong Sabuda.
Haba leit ban ujor ruh sha u Deputy Commissioner ka Ri Bhoi, na ka liang ka Synjuk bad ka KSU ym tang ba ki la pyntip ban ujor halor kane ka jingthmu pyntreikam ka Assam ïa ka skhim sam bording ha ka shnong Sabuda bad ki la aiti ruh ïa ka dorkhas ba pynpaw ka jingpyrshah halor kane ka jingthmu ka Assam ban pyntreikam ïa katei ka skhim sam bording khlem da pyntip sha ka bor shnong bad wat ka sorkar Meghalaya kam don jingtip satia.
Haba ïa kren bad ki Nongthoh Khubor hadien ka jingkynduh ïa u Deputy Commissioner ka Ri Bhoi, u Arpit Upadhyay ha Nongpoh, u Chairman ka Synjuk ka Raid Nongtung Border Area, u Bah Blikshon Sohtun, u la ong b aka sorkar Assam katba dang mih ki sngi ka la dang pyni ïa ki kam leh donbor ha kitei ki shnong khappud bad wat ïa katei ka jingthmu ban pyntreikam ïa ka skhim sam bording ha ka Shnong Sabuda kam shym la pyntip satia ia ka bor shnong bad ruh sha ka sorkar Meghalaya ha kaba la shu leh donbor tang ban ioh ban pyntreikam jubor ïa katei ka skhim sam bording.
U la ïathuh ruh ba ka sorkar Assam na ka por sha ka por ka juh wan rah ïa ki kam pynroi sha kitei ki shnong khappud khlem da pyntip sha ki bor shnong bad wat sha ka sorkar Meghalaya bad lada wan pat ki kam pynroi na ka sorkar Meghalaya ka ju pynthud lyngba ki bor pulit bad katba ki kam pynroi na Meghalaya kim ju don jaka ha kitei ki shnong khappud ba dang kajia pud haduh kine ki sngi.
“ Ka sorkar Meghalaya dang ha u snem 2017 ka la wan rah ïa kawei ka skhim sam bording ha kitei ki shnoing khappud ba la tip kum ka Rural Electrification lyngba ka schim Deen Dayal Upadyaya Jyanti Yojana bad kaei kaba sngewsih ka long ba ïa kane ka kam pynroi la shah pynthud ha ki pulit ka Asam bad mynta pat kumno ka sorkar Assam kan wan rah ïa kane ka kam pynroi ban sam bording ha kitei ki shnong khappud khlem da pyntip sha ki bor shnong bad ki bor sorkar ka Meghalaya” ong u Bah Blikshon Sohtun Chairman ka Synjuk.
U la ïathuh ruh kiba bun hi ki kam pynroi ba wan rah da ka sorkar Meghalaya kam ju don jaka ha kitei ki shnong khappud ha kaba la ju shah pynthud ha ki bor pulit ka Assam bad ki kam pynroi ba wan na Assam pat ki ioh ban pyntreikam suk ba kum ka synjuk bad ki paidbah kin nym lah ban pdiang da lei lei ruh bad kin pyrshah ba kin nym pdiang ïa kitei ki kam pynroi ban sam bording sha kitei ki shong khappud ka Block II.
Namarkata, dei halor kine ki kam leh donbor ka Assam ban wan rah ïa ki kam pynroi khlem da pyntip sha ka bor shnong bad sha ka bor sorkar ka Meghalaya na ka liang ka Synjuk bad ka KSU ki la leit ban ujor sha u Deputy Commissioner ka Ri Bhoi ryngkat ka jingthoh ban dawa tuklar ba dei ban pynsangeh ïa katei ka jingthmu pyntreikam ka sorkar Assam ïa katei ka skhim sam bording ha kitei ki shnong khappud ba hap ha ka Raid Nongtung ha Block II, u la bynrap.
Halor kine kam pynibor ka sorkar Assam, ka KSU Eastern Border Ara lyngba u President, u Bah Banjop Maring, u la ong ba ka KSU ka pyrshah jur ban wan rah ïa katei ka skhim sam bording ka Assam ha ki shnong khappud bad ka la dawa ruh na ka sorkar Meghalaya ba dei ban tuklar mardor ban pynsangeh ïa katei ka skhim sam bording bad lada ka sorkar Meghalaya ka leh mynthi kum ka seng kam banse ban shim da kiwei ki lad ki lynti ha kaba kumno tang ki kam pynroi na Assam ba lah ban pyntreikam ha kitei ki shnong khappud bad katba ki kam pynroi na ka sorkar Meghalaya pat kam don jaka ha kitei ki shnong khappud, u la bynrap.
