Nongpoh, Nailar 16: Namar ka jingeh ba ïakynduh da ki nongkhaii tympew haka thaiñ Byrnihat ba kim don ïaka iew ban ïa die ïa thied khamtam ba kadei kawei naki jaka khaii tympew kaba heh ha Ri-Bhoi ba ki nongrep ki hap ban shu buh ha madan madiah, u MLA ka Jirang, u Bah Sosthenes Sohtun mynta ka sngi u la phah syndon da ka jingthoh sha u Myntri Rangbah ka jylla u Conrad Sangma naka bynta ban pynmang skhim ban pynioh ïaka iew ba paka naka bynta ki nongrep tympew.
Ha katei ka dorkhas bala phah sha u myntri rangbah ka jylla u Bah Sosthenes Sohtun u la pynpaw halor ka jingeh kaba khraw ba ki nongrep tympew ki ïakynduh ha kaba ïadei bad ka jaka khaii bad ïadie ïathied, ba kam don ka jingkhuid jingsuba ba ki nongrep ki hap ban buh ha madan madiah ïaki tympew ba kila dep ban kheit, u ba dei ruh uwei naki jait jingthung ba ki paidbah nongrep ki kamai bad pyndap ïaki jingdonkam ha iing ha sem.
Namar kata lyngba katei ka dorkhas naka liang u Bah Sosthenes Sohtun u la kyrpad sha u myntri Rangbah ba u dei ban pynmang skhim naka bynta ban shna da ka iew kaba paka naka bynta ki nongkhaii tympew ha katei ka thaiñ 14 lane 15 mer naka bynta ka jingbit jingbiang jong ki nongkhaii bad ki nongrep tympew kaba la shu antad ba ka jinglut ban tei ïa katei ka iew kan poi kumba 40 lak.
