Nongpoh, Nailur 26 : Ka Synjuk ki Rangbah Shnong Ri Bhoi ryngkat bad ki kynhun sengbhalang naduh ka KSU, HNYF bad FKJGP hapoh ka lama ka JAC to oppose power franchisee in Ri Bhoi mynta ka sngi kila leit ban kynduh syndon ïa u Symbud Myntri Rangbah ka jylla u Bah Prestone Tynsongban pyrshah ïaka jingthmu Jong ka sorkar ban aiwai lane aiti noh ïaka tnad MeECL Umsning Division sha ki kompani shimet.
Ki nongïalam ka JAC hapoh ka jingïalam jong u Bah BB Makdoh Chairman, Ferdinald Kharkamni Secretary ba dei ruh u President ka KSU North Khasi Hills District, Bah Lui Lyngdoh President FKJGP, Bah Marcus Marten President ka HNYF Northern Region, Bah PB Sylliang bad kiwei kiwei ki riew rangbah.
Haba kren sha ki nongthoh khubor naka liang u Bah Ferdinald Kharkamni General Secretary ka JAC u la ong ba kum ka JAC ka pyrshah jur ïaka jingthmu jong ka sorkar ban lilam lane aiti noh ïaka MeECL Umsning Division sha ki kompani shimet namar khlem pep ki paidbah kin mad shibun ki jingeh, ki jinglehmon bad ka jingthombor ïaki paidbah da ki riew shimet lane ki briew ki bym pat don ka jingshañiah ban lehmon ha kaba ïadei bad ka jingsam bording ba khamtam ha kaba ïadei bad ki rukom siew rukom tda ïaki bill bad kiwei kiwei kaba ki paidbah kim pat ioh kano kano ka jingpynshai ha kaba ïadei bad katei ka jingthmu.
U la ong ruh ba kum kane ka jingeh la sakhi ruh ha kiwei ki ja ka kum ha Mawsynram, Mawkyrwat, bad haki thaiñ Garo hadien ba kala aiti sha ka FEDCO.
Namarkata naka liang ka JAC kala kyrpad sha u Symbud Myntri Rangbah ba u dei ban shimkhia ïa katei ka kam kaba kum ki paidbah bad nongïalam shnong ki pyrshah jur ban aiti noh ïa katei ka tnad MeECL Umsning Division sha ki kompani shimet.
