Sha shnong u ksai ryndia, leit kynduh u Myntri Sorkar Pdeng ïa ki nongthaiñ, kular ban kyrshan jingïarap

Nongpoh, Risaw, 27: U Giriraj Singh Myntri ka tnad Rural Development and Textile jong ka sorkar pdeng mynta ka sngi u la leit hi sha ka thaiñ Umden bala tip kum ka shnong u ksai ryndia ban ïakynduh ïa ki nongthaiñ jaiñ, ki nongshna tiar kti, ki nongrep bad ki nongioh bynta ïa ka skhim Pradhan Mantri Awas Yojana (PMAY) and Mahatma Gandhi National Rural Employment Guarantee Act (MGNREGA).
Ha katei ka jingleit tur u myntri sha ka thaiñ Umden, u la leit ruh ban jngoh ïa ka Design Innovative Research Centre (DIRC) ha Diwon ban sakhi ïa ka rukom thaiñ, ka rukom thir ksai bad ka rukom wieh rong ïa u ksai ryndia ha kaba la sakhi ruh da ka jingdonlang u Abhilash Baranwal Deputy Commissioner ka Ri-Bhoi, ki ophisar na ki tnad sorkar bapher bapher bad kiwei kiwei.
Hadien ka jingleit jngoh bad ïakynduh ïa ki nongrep, la pynlong ruh da ka jingïalang ha DUYA hall ha Diwon ha kaba u myntri u la kular ïa ki nongthaiñ ban kyrshan jingïarap na ka sorkar jylla bad kumjuh ruh ka sorkar pdeng, bad kum ka sorkar ka angnud ba ka jingioh ki nongthaiñ kam dei ban duna ïa ka 15 hajar shi bnai.
U la ai ruh ka jingïaroh ïa u Myntri Rangbah ka ri u Narendra Modi u la don ïa ka thong ban kyntiew ïa ka ioh ka kot ki longkmie haka ri ha kaba mynta ka kynti ka sorkar ka la mang haduh kumba 9 lakh klur ban kyntiew ïa ka ioh ka kot ki longkmie bad ka jylla Meghalaya ka dei kawei na ki jylla kaba la shah kynthup ha katei ka mang tyngka.
Ha katei ka sngi la sam ruh ïa ki Artisan Cards sha ki nongshna bad nongthaiñ kti ba kin ioh jingïarap na ka sorkar.