Shillong, Risaw, 19: Ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSASTA) ha ka sngi Saitjaiñ ki la rai ban tur sha Secretariat ha ka 23 tarik mynta u bnai namar ka jingbym patiaw jong ka Sorkar Jylla ïa ka jingdawa ban kyntiew tulop shispah percent.
Ïa kane ka rai, ki nonghikai skul SSA ki la shim ha ka jingïalang General Executive Committee kaba la long ha madan Malki, Shillong.
Ka jingïakhih ba khlem pud sngi jong ki nonghikai skul SSA ha madan Malki, Shillong ka la kynjoh mynta sha ka sngi kaba khat khyndai namar ka jingbym lah ban shim rai bad ban ai da ka jingthoh ïa ka jingdawa ba kane ka kynhun ki nonghikai ki la dawa na ka Sorkar.
U President jong ka AMSSASTA u Bah Peter Thyniang ha ka jingïakren bad ki lad pathai khubor hadien ba la wai ka jingïalang u la ïathuh ba ka jingshim rai ban leit tur sha Main Secretariat ka long ban pynbor ïa ka Sorkar Jylla ba kan kyntiew noh ïa ka tulop jong ki nonghikai skul SSA da shi spah percent.
“Ha kane ka jingïakhih kaba la kynjoh sha ka 19 sngi, i kumba ka Sorkar kam don skhor ka la kyllut bad kam pynsngap eiei. Ngi la rai da kawei ka jingmut ban pynjur shuh shuh ïa ka jingïakhih naduh ka taiew ka ban sa wan,” u la ong.
“Ki nonghikai na kylleng ka ri Khasi bad Jaiñtia bad na rilum Garo kin sa wan shaw ïa ngi ki nonghikai kiba shong ha Madan Malki ban leit on noh sha Secretariat. Ngin mih nangne ban dawa ïa ka Sorkar namarba ka shym la leh eiei bad kam shym la khot ïa ngi haduh mynta ban ïakren ïa ka jingdawa,” la bynrap u Bah Thyrniang.
“Ngi khot bad wer ïa baroh ki nonghikai kiba don ha Meghalaya ba kin khang ïa ki skul ha ka 23 tarik Risaw, wan ban ïasnoh kti lang bad ngi, khot ïa ki bahaing hasem, khot ïa ki paralok parajor ban wan synran lem ïa ngi. Ki sengbhalang bapher bapher kin sa don lang bad ngi ban leit on ïa ngi hakhmat ka Secretariat,” la kyntu u Bah Thyrniang.
Haba kylli, u la ong, “ha ka jingïalang, ngim shym la ïakren eiei ïa kiwei pat ki mat hynrei ngi la ïakren beit tang ha kaba ïadei bad ka jingdawa ban pynkiew tulop. Lada ngi dang ïai bteng ban shong hangne (ha madan Malki) i kumba ka Sorkar kam ïohi ïa ngi dei na kata ka daw ngi la rai ban tur beit sha Secretariat, long katba long, jia katba jia, ki nonghikai kin sa leit on ïa ngi.”
U la ïathuh ruh ba naduh ka sngi nyngkong ba kum ki nonghikai ki la pynlong ïa ka jingïakhih, kam pat don satia kano kano ka jingphah khang khyrdep ïa ki skul hapoh ka jylla hynrei la shu ïa bujli ïa ki nonghikai da kaba bthah uwei/kawei kin don ha skul bad uwei/kawei kin wan sha madan Malki.
Na ka liang jong u Joint Secretary jong ka All Garo Hills SSA Teachers Association u Silseng R. Marak u la ai jingkren ruh da ka ktien Garo ban pynsngew ïa ka jingdawa sha ka Sorkar Jylla.
