Sha Quarter ka Muncipal rai ka Sorkar ban pynkynriah ïa 342 ïing ki Harijan na Them Iewmawlong

Shillong, Nailar 31 : Ka sorkar jylla ha ka sngi Balang ka la shim ia ka rai ba baroh ki 342 tylli ki longïing kiba sah ha Them-Iewmawlong baroh shi katta kin sa shah pynkynriah noh sha ka quarter jong ka Shillong Municipal Board kaba don ha Bishop Cotton Road.
Ia kane ka rai ka sorkar jylla ka la shim ha ka jingialang kaba long hapdeng u Symbud Myntri Rangbah ka jylla ba dei ruh u Chairman ka High Level Committee Bah Prestone Tynsong bad u Myntri ka tnad Urban Affairs ka sorkar jylla Bah Sniawbhalang Dhar nalor ki ophisar jong ki tnad ba dei peit.
“Hadien ba ngi la bishar lut ïa baroh ki liang, mynta ka sngi ngi la mynjur ïa ka jaka ba la jied da ka Urban Affairs ban pynkynriah noh ïa kito kiba sah ha Iew-Themmawlong sha ka quarter jong ka Shillong Municipal Board kaba don mar pyrshah bad ka quarter jong u Nongïalam ka Liang Pyrshah,” ong u Bah Prestone Tynsong haba kren bad ki lad pathai khubor hadien ka jingïalang.
U la ong ruh ba ka bynta kaba ar pat ka long ba kin hap ban tei thymmai biang ïa ki ïingsah namar katkum ka jingkhein ba la ai da ka tnad Urban Affairs lah ban pynrung baroh 342 tylli ki longïing ha katei kajuh ka jaka.
“Kumta halor kane, nga la bthah ïa ka Urban Affairs ban ai lut ki jingtip kiba ïadei bad ki jingdro, ka jinglut bad katno kan poi na ka bynta ban shna ïa kitei ki quarter,” u la ong da kaba bynrap pat ba shen un sa khot ïa kren bad ki nongïalam ka Harijan Panchayat Committee.
U Symbud Myntri Rangbah u la ong ruh ban shna ha ka rukom ka flat system kin don ym duna ïa ki 12 tylli ki block ha kajuh ka jaka ha kaba kin sam pat kawei kawei ka unit sha kito ki briew kiba la don kyrteng ha ka thup jong ki 342 tylli ki longïing kumba kdew da ka High Court.
Katkum ka jingong jong u, ka jingtei kaba mynta kam pat long kaba skhem haduh katta katta na ka bynta ban pynrung lut ïa baroh bad kumta la rai ban tei thymmai pat. “Na kane ka daw nga la bthah ïa ka tnad ba kan pynkhreh ïa ka DPR bad baroh ki jingtip bad hadien kane ka sorkar pat kan sa ïaid shakhmat na ka bynta ki jingtei ha katei ka jaka kaba heh 2.5 akar,” u la ong.
Shuh shuh u ong ruh ba ïa katei ka DPR kin sa pyndep la kumno kumno hapoh shibnai lane shibnai shiteng.