Shillong, Jylliew 06 : U nongïalam ka BJP bad MDC ka Tura, u Bernard N Marak ha ka sngi U Blei u la kynnoh ba dei ki kontraktor bym pat rejistar kiba pyntrei ïa ki projek smart town.
Utei u MDC ha ka kyrwoh u la kynnoh ruh ba katkum ka RTI la kdew ba ïa ka kam la aiti sha ki kontraktor bym pat rejistar satia ïalade nalor ba kim pat don satia wat ïa ka jingtbit ha ka kam ruh. Katkum ka jingong jong u, bun ki shnong ki la ujor halor ka rukom trei kaba torti bha da kitei ki kontraktor hapoh ka smart town.
“Lada ym peitngor bha, kan dei ka jingduhnong hi ïa ka dong,” u la ong da kaba bynrap ba ka jingduh kan kham jur lada ïa ka kam ym lah ban pyntrei katkum ba la mang. Ha kawei pat ka liang u la buh jingkylli ruh ïa ki Development Committees ba kin buddien bad peitngor bha ha baroh ki kam khnang ba ka rukom pyntrei kam dei satia ban long kaba torti bad ruh ban pyntikna ba haman la ki dong ka jingpyntrei kadei ban long beit ha ka por ba la buh bad ruh ban da pynshisha da ki nongshongshnong ha shwa ban pyllait ïa ka jingsiew kaba khatduh.
Utei u MDC u la ong ruh ba kadei ka kamram jong ka Development Committee ban peit bha ïa ka kam namar dei ka shnong kaban myntoi nalor ba la pyntrei ïa ka da kaba shim ram. Nalorkata, u ong ruh ba ka jingkitkhlieh ban siew ïa katei ka ram kan dei beit da sorkar kaba thymmai hadien ka elekshon MLA ha u 2023.
“Kumta, ïa ka kam dei ban pyntikna ba dei ban peitngor bha. Nga ai jingmut ruh ba kan bha shibun ba ïa ka kam dei ban aiti beit ha ki Development Committee ha man ki dong,” u la bynrap biang. Utei u MDC ka Tura u la kyntu ruh ïa ki Development Comimittee ba ki dei ban ujor mardor sha u MDC ka thaiñ haba don kino kino ki rukom pyntrei torti bad ruh ban ïatreilang na ka bynta ka jingïaid beit ka kam.
Shuh shuh u ong ruh ba ki la don bun ki jingujor kiba wan na ki dong bapher bapher bad ïa kine hadien ba la bishar bniah bha yn sa ujor pat sha ki bor pulit bad ki tnad ba dei peit. U ong ruh ba ïa ka pisa paidbah hi ym dei satia ban shu pynsepei.
