Shillong, Nailar 14 : U Myntri Rangbah ka Jylla Conrad K Sangma ha ka sngi Palei u la pyllait paidbah ïa ka jingkyrshan pisa ha ka kylla kaba nyngkong kaba long 2,500 tyngka na ka skim FOCUS + sha ki palat 93,000 ngut ki nongïoh jingmyntoi na ka bynta ka samoi treikam jong u FY 2023-24 kaba la kot baroh sha ka 23.25 klur tyngka.
Kane ka sienjam ka long shi bynta ban pynkup bor shuh shuh ïa ki longiing ha nongkyndong bad khamtam eh ban pynkhlain ïa ki kam ba ïadei bad ka rep ka riang ha ka jylla.
Ïa ka FOCUS+ la pyllait paidbah ha u Naitung 2022 kaba dei shi bynta ban pynïar shuh shuh ïa ka jingshakri jong ka Farmers’ Collectivisation for Upscaling Production and Marketing Systems (FOCUS).
Lyngba kane ka FOCUS+ ka la kyrshan haduh 1.5 lak ngut ki nongrep. Hapoh kane ka skim, haduh 75.3 klur tyngka la dep ban pyllait na ka bynta ban kyntiew shuh shuh ïa ka rep ka riang haduh mynta. Nangta ruh ban kyrshan ïa ki longiing ha nongkyndong ba kin shim bun ki lad ki lynti kiban kyntiew shuh shuh ïa ka kam rep bad ka ri jingri ha ki nongkyndong.
Na ka liang u Myntri haba kren halor kane, u la banjur ba ka thong jong kane ka skim hi ka long ban pynkylla dur ïa ki nongkyndong ka jylla da kaba ong ruh ba kane kadei ka sngi ban sah jingkynmaw na ka bynta baroh.
“Ki la don palat 10,000 ngut ki paidbah na ki 52 tylli ki C&RD Block na kylleng kibynta jong ka jylla ki la snohkti lang ha ka jingkren online kaba pynïasoh lyngba ki kor ki bor technology. Man ka por nga ju ong ba ngi don ïa ka thong ban kot sha kata ka ïoh ka kot ba $10 billion ha shwa ban poi u 2028. Ki surok, ki jingtei ïa ki jaka treikam, ki jaka ïalehkai kin ym lah satia tang ma ki hi ban poi sha ka thong hynrei donkam ka jingïohi jngai jong baroh ki nongshong shnong, ki shnong ki thaw, ki block bad distrik ban kiew lang ryngkat ryngkat,” u la ong.
Na ka liang u Bah Batskhem Nongrum, uwei na ki nongïoh jingmyntoi na Mawkynrew Block bad u dkhot jong ka Dohlang Producer Group, u la pynpaw ka jingsngewnguh halor ki lad k lynti bad ki jingkyrshan pisa kiba wan lyngba ka skim FOCUS. U la pynpaw ruh ka jingkyrmen ba kine ki skim bapher bapher kin ïai bteng lyngba ka FOCUS bad FOCUS+.
Da ka jingtheh pisa kaba kot sha ka 500 klur man u snem, ka FOCUS bad FOCUS+ ki don ruh ïa ka thong ban theh haduh 5,000 klur tyngka sha ki paid nongrep ka jylla ha kine ki 10snem ban wan khnang ban pyntikna ba kin lah ban ieng ha la ki jong ki kjat.
