Nongpoh, Nailur 30: Kawei ka kali Maruti Swift kaba don ïa u number ML 05 P 1771 ba la shong ruh da 2 ngut ki briew bym pat lah ban ithuh kyrteng, ka la hap syndon sha nala harud surok bah National Highway 6 haka shnong Umsamlem ha Ri-Bhoi District.
Katkum ka jingtip ba la ïoh lum la ong ba kane ka jingjia ka la jia mynta ka janmiet haka por kumba 4:30 eiei ba la suba ruh ba katei ka kali ka la hap ka dei namar ka jingpynher sted, kumba la ïathuh da katto katne ngut ki paidbah na katei ka thaiñ haduh ba kan da julor syndon ki bynta ba shakhmat.
Na ka liang ki Pulit ki la poi mar mar sha katei ka jaka ban pynlong ka jingtohkit bad la rah noh ïa kitei ki 2 ngut ba shong hapoh katei ka kali sha Umsning CHC na ka bynta ka jingsumar.
